„Веројатно повеќето од оние кои очекуваа дека 2018 година ќе биде година на пресврт во демократска држава, година на правната држава, година во којашто ќе се остварат поголем дел од оние ветувања за кои што се излегуваше со години по улици, и за коишто се направи целиот политички пресврт во Македонија, во смисла на рушењето на режимот на Груевски и доаѓањето на новата власт предводена од СДСМ, веројатно повеќето од нив, коишто имаа такви оптимистички очекувања на крајот од годината остануваат многу разочарани“, вели Сашо Орданоски во разговор со ЦИВИЛ Медиа за Перспективи 2019.
За 2019 година, којашто Владата ја најавува како економска година, Орданоски вели дека не постојат многу податоци и предвидувања кои укажуваат дека навистина ќе биде така.
„2019 година е година кога не очекуваат претседателски избори коишто најверојатно ќе бидат неуспешни, бидејќи цензусот од 40%, односно 720.000 гласачи коишто ќе треба да излезат, веројатно ќе биде тешко да се достигне. Особено, земајќи го предвид овој голем квантум на разочарани гласачи којшто се движи негде помеѓу 30 и 40%, и којшто ако веќе не излезе за да ги поништи своите гласачки ливчиња тогаш најверојатно нема воопшто да излезе на гласање. Соочени сме и со можноста некоја од партиите да го бојкотира тој процес“, вели Орданоски.
Тој смета дека таквата криза ќе премине и во Уставна криза каде што ќе мора да се помине во една фаза каде што нема да се бира претседател според постоечките уставни норми, туку ќе мора да се менува Уставот, за да се регулира тоа прашање на поинаков начин, или со намалување на цензусот, или со некаков нов вид на бирање претседател, можеби, во Парламентот.
„Притоа, ние гледаме дека со секое отварање на Уставот, ние имаме низа други компликации, каде што секој гледа да додаде или да одземе нешто. Тоа ќе ја заглави Македонија повторно во едни нови дебати и дискусии коишто ќе значат одолговлекување и трошење на времето на она што ќе значи, многу повеќе политика, отколку социјала, економија и се останато“, вели Орданоски, сметајќи дека се отвора можноста и за повикување на предвремени парламентарни избори.
„Мислам дека Македонија сè уште е далеку од излегувањето на појасни и поперспективни патишта што во крајна линија ќе значат подобар живот за луѓето.. Македонија е на еден крстопат во политичка и економска смисла. Тој крстопат мислевме дека ќе го поминеме полесно. Но, излезе дека се длабоки корените на кризата која што почнавме само да ја разрешуваме од 2016, 2017, 2018 и очигледно дека ќе треба барем уште две години за опстанок во оваа загадена земја во секоја смисла “, изјави Орданоски
Биљана Јордановска
Обработка на текст: Маја Ивановска
Камера: Дехран Муратов
Фотографија: Ангела Петровска