ДРАГАН МИШЕВ
На вчерашната координација која се одржа во салата на Владата во Собранието, во присуство на великодостојниците, претседателот на Собранието Африм Гаши, потпретседателката Бендевска, топтан сите координатори од ВМРО – ДПМНЕ, СДСМ, ВЛЕН, ЗНАМ и Левица, како и претставник од Владата, консензуално беше донесена одлука Собранието (повторно) да ги откаже сите активности планирани за оваа работна седмица, вклучително и пратеничките прашања и брифингот со новинари.
Значи, Болјарите од Собранието си дадоа распуст, втора недела по ред, вадејќи се на трагедијата во Кочани, и замислете, притоа ги земале предвид чувствата на сите граѓани, изразувајќи почит кон сите загинати“… А сите граѓани, односно обичната раја, чии чувства собраниските Болјари ги земале предвид, ќе си р’мба и во денови на жалост, и по деновите на жалост, ќе тагува, ќе голта солзи, и ќе р’мба. Раја.
А јас па наивен, помислив дека седницата ја закажале за да се договорат, по примерот на некои бугарски пратеници, да издвојат дел од скромната им платичка како донација за настраданите во пожарот во кочанската “дискотека“.
Не, чекајте, да не избрзуваме со заклучоци. Со неработењето, всушност, тие се откажуваат од патните трошоци кои би ги земале доколку во период од две недели патуваат со своите болиди на работа, и ги отстапуваат овие средства на Буџетот на РСМ, да помогнат во справувањето со последиците од трагедијата.
Веома врло хумано, солидарноста на дело. Алтруизам и ренесанса.
Текстот е личен став на авторот
