Лидерот на Левица и пратеник во Собранието на Република Северна Македонија, Димитар Апасиев, се „пофали“ на социјалните мрежи дека слетал во Москва, Русија, по повод прославата на 80-годишнината од Денот на победата на фашизмот.
„Не сум “светски лидер”, ама слетав во Москва“, објави Апасиев.
Откоко успешно слетал во Москва, ја објави и поканата.
„Некој од задњи ред кај Трамп, некој со официјална покана за воената парада на Црвениот Плоштад“, алудирајќи на неодамнешната посета на премиерот Христијан Мицкоски на САД, каде учествуваше на инаугурација на американски претседател Доналд Трамп.
На „гости“ кај Комунистичката партија на Русија
На покана на претседателот на Комунистичката партија на Руската Федерација (КПРФ), Генадиј Зјуганов, претседателот на Левица, Апасиев заедно со членот на Президиумот на Партијата, Александар Симонов, се во официјална посета на Руската Федерација по повод 9 мај – Денот на победата над фашизмот.
Левица повеќе и не крие дека Северна Македонија треба да соработува и со Русија и Кина. Ова не е прво патување на левичарите во Москва. Со овој потег покажува непочитување за цивилните жртви во Украина и дава поддршка на милитаристистичката политика на Русија против која е речиси цела Европа и демократскиот свет.
Особено шокантно беше и неговото поклонување на гробот на Енвер Хоџа.
Среде руската агресија врз Украина, членови на партијата Левица ја посетија Москва, каде што, според партиското соопштение (објавено на 22 мај 2022), имале средба со лидерот на Комунистичката партија на Руската Федерација (КПРФ), Генадиј Зјуганов, како и со раководството на партијата и дел од пратениците во руската Дума.
Левица под темната сенка на Москва
Неколку помали здруженија и политички партии и десничарската Левица на Апасиев, непречено шират руска пропаганда во земјава, а нивните поддржувачи на социјалните мрежи, но и во дел од медиумите, континуирано ја величаат бруталната агресија на Русија врз Украина. Нивната активност, освен да ја шират руската пропаганда и дезинформации за војната, вложуваат големи напори и да ги оправдаат или целосно да ги негираат грозоморните воени злосторства што ги вршат Русите врз цивилите во Украина.
Пратениците на Левица неколку пати „ги пеглаа односите“ со рускиот амбасадор Баздникон во Собранието на Република Северна Македонија
На 20 февруари 2025 година, во репрезентативната „Струшка сала“ на Собранието на Република Северна Македонија, пратениците на Левица, Димитар Апасиев и Реџеп Исмаил, остварија средба со рускиот амбасадор Баздникин. На средбата, како што објавија, разговарале за повторно воспоставување нормални односи меѓу двете земји. Пратениците на Левица потенцираа дека нашата држава треба да води суверена и независна надворешна политика, ослободена од диктатите на ЕУ и НАТО.
Исто така и на 16 март 2022, неколку дена по рускиот воен напад врз Украина, екстремните левичари, шефот на Левица, Димитар Апасиев и неговиот колега, пратеникот Борислав Крмов, го примија рускиот амбасадор Сергеј Баздникин во Македонскиот парламент. Како што се пофалија „домаќините“, тие 90 минути разговарале без преведувач, на македонски јазик, за „денацификација и елиминирање на заканите од екстремно-десничарските и радикалните неонацистички политички движења, кои се опасност за секоја современа демократија.“ Оваа средба беше со гордост објавена на партиската веб страница, а ја пренесоа и голем број медиуми.
Левица не е русофилска партија?!
Левичарите се обидоа да се оградат дека не се русофилска партија. Меѓутоа, нивните дела го покажуваат токму спротивното.
„Се создава погрешна претстава дека Левица е русофилска партија.“
Ваквото бегање од фактите е, во најмала рака, многу чудно.
Апасиев со тужба кон Дерала оти во колумна напишал дека е инсталација на Кремљ
Своевремено, Апасиев не се срамеше да ја поведе целата партија во судски спор против Џабир Дерала од ЦИВИЛ, за личен став (Леви десничари… Фејкери!). Текстот, за кој го тужеше Левица, меѓу другото, се однесуваше на фактот дека се инсталација на Кремљ чија цел е да ја осуети македонската иднина. Во судница ѝ се жалеше на судијката дека пишувањето на Дерала ѝ нанело штета на партијата и предизвикало раскол. Не грубата кражба на парите и чистките што ги спроведе, туку колумната на Дерала. Замислете?!
Левица се спротивстави и на собраниската декларација за осуда на руската агресија
Левица, не само што не ги даде своите пратенички гласови за Усвојување на Декларацијата за осуда на воените напади во парламентот на 3 март 2022, туку и жестоко ѝ се спротивставија.
„Фактот што во Собранието имаме про-фашистички елементи изгласани од граѓани, кажува дека или граѓаните што ги гласаат не препознаваат зло, или и самите се дел од злото, а судејќи по добар дел реакции од граѓани – силни поддржувачи на тотално обратната ориентација на политичкиот субјект од тоа што се нарекува (Левица) и не само на Левица, сосема се во иста ментална матрица. Што е уште позагрижувачко“, напиша Дијана Тахири во својот коментар „Најмалку што можеа да направат вчера пратениците е да ги исвиркаат Апасиев, Крмов и Стоиљковиќ, ама немале свирчиња“!
Во тоа време, Владата се придружи на големиот број држави во Европа и во светот кои ги забранија пропагандните гласила на воинствениот режим на Путин, РТ и Раша Тудеј, но тоа не ги спречи проруските инсталации во земјата да продолжат со пропагандата.
„Се поставува прашањето – ќе се исклучи ли микрофонот на „Раша тудеј“ во македонското (општество) Собрание!?“ – прашува Дехран Муратов во својот коментар „Ќе го исклучи ли некој микрофонот на „Раша тудеј“ од собраниската говорница?“.
Поддршка за руската агресија, манипулации и повици за убивање
Пратеникот на Левица, Борислав Крмов, на (24 февруари 2022), денот кога започна воената агресија на Русија на својот Твитер профили објави стара фотографија од 2014 година со припадници на паравоена структура на Украина, групата Азов, со коментар дека „многу борци за човекови права ќе изгинат“.
По истиот повод, пратеникот и шеф на Левица, Димитар Апасиев, свесно манипулира дека во знак на поддршка на Украина, министерот Бујар Османи го обои МНР со боите на знамето на Косово.
Дали, откако Апасиев отиде на „баци-рака“ кај Путин, нашата земја од „непријателска“ ќе стане „пријателска“ за Русија? Или ова е само уште еден пропаганден потег во корист на режимот во Москва и исполнување на очекувањата на руските инсталации во земјата и шефот во Москва?
9 мај – прослава на Сталиновиот хир
Русите до ден денес го слават 9 мај како Ден на победата. Предавањето на Ремс дури еден ден порано не беше објавено во советскиот печат, доказ според некои набљудувачи дека второто предавање беше пропаганден потег оркестриран за Сталин да може да бара поголем дел од заслугата за завршување на војната.
Така, 9 мај (о)стана ден на победата на советите над нацистичка германија, кој освен Советскиот сојуз го прифатија и земјите од источниот блок, како и земјите од поранешна СФРЈ.
Денот на победата – алатка на Путиновата пропаганда
Со доаѓањето на Путин на власт во 2000 година. Денот на победата се користи како клучен елемент на неговата домашна пропаганда, зајакнување на „патриотизмот“, глорифицирање на руската војска и да ја мобилизира јавноста пред западната „закана“ за Русија.
Дехран Муратов во соработка со ЦМДТ
Фото: Фејсбук на Апасиев / Левица
