„Пред ова Јавно обвинителство се водат повеќе предистражни постапки кои за цел имаат спроведување на финансиски истраги против поголем број на физички и правни лица. Целта на овие предистражни постапки е да се провери имотната состојба на сите лица за кои се отворени постапки и нивното севкупно финансиско работење. Проверката на имотната состојба подразбира детални проверки за целокупниот имот што лицата може да го поседуваат и тоа, како недвижен, така и подвижен имот“, се вели во последното соопштение на Специјалното јавно обвинителство, како одговор на прашањата упатени од дел од медиумите кои се однесуваат на јавно објавените барања.
„Испратени се голем број на барања до различни институции, со напомена дека бараните податоци се во врска со предистражни постапки. Укажуваме државните институции да преземат мерки со кои ќе се оневозможи јавно објавување на податоци за предистражни постапки кои, согласно законските прописи, се тајни. Недозволиво е државни институции да им овозможат увид на лицата за кои се вршат проверки во видот и карактерот на проверките кои ги врши ова Јавно обвинителство, согласно законските овластувања и прописи“, велат од СЈО.
Пратеникот од ВМРО – ДПМНЕ Антонио Милошоски на својот Фејсбук профил објави документи кои ги бара СЈО како дел од предистражна постапка. Според документите кои Милошоски ги објави, од СЈО проверуваат дали тој поседува авион. Барањата се испратени до Централниот регистар и до Министерството за транспорт и врски на 31 март. Според законскиот рок од пет дена, одговор институциите треба да достават најдоцна до утре, 5 април.
„СЈО продолжува со нарачаниот притисок врз неистомисленици на Аболицираниот. После моите настапи на Топ Тема контра Оливер С. и во Собранието против Заев,
– прво стигна предупредување од пратеник од СДСМ дека многу зборам,
– а сега и истрага од Катица Јанева, која ги бара моите авиони и фирми кои ги немам!
Само продолжете, нема да не’ замолчите!
п.с. Документите ги добив од чесен граѓанин, патриот, свиркач, кој иако е вработен во СЈО, се спротивставува на злоупотребите и непрофесионализмот на оваа институција!“, напиша Милошоски на Фејсбук.
