Канцеларијата на Здружението на текстилни и кожарски работници „Тивкото мнозинство – Гласно!“ во Штип, синоќа повторно е каменувана! Искршени прозорци, табли на покривната конструкција и оштетен плафон затекнале членовите на здружението, пред да заминат на пат во Крива Паланка, како подршка на штрајкот на работничките во фабриката за чевли во овој град
Ова е второ каменување на канцеларијата на здружението. Првиот напад се случи на 26 ноември минатата година, непосредно пред големиот собир на работници од цела Источна Македонија. Овој напад бил пријавен во полиција, биле земени докази и изјави од сведоци, но според зборовите на претставниците на здружението, до денеска, СВР Штип сé уште не излегол со извештај за истрагата и за евентуално пронаоѓање на сторителите.
Поради штрајкот на работниците од Крива Паланка, кој е поддржан од здружението „Тивкото мнозинство – Гласно!“, претставници на здружението денов го поминаа на терен, а СВР Штип ќе биде известен попладнево, за негова екипа да изврши увид.
„И овој напад го сфаќаме како камен фрлен по работниците кои немаат никакви права на работното место, а земаат плата под минималната, утврдена со закон на Република Македонија. Просторот на ‘КУЦ Текстил’ и на ‘Гласно’, не е само простор, материјален… ‘Гласно’ е идеја! А идејата е отпорна на камења!“, порача Кристина Ампева, член на здружението „Тивкото мнозинство – Гласно“.
