пишува: МИРЈАНА НАЈЧЕВСКА
Полицаец тепал човек, МВР истражува
Кривични пријави за десеттемина дрвокрадци кои тепаа полицајци
Протест и контрапротест – едни ќе протестираат против полициската бруталност, други ќе си ги бранат колегите
ЦИВИЛ со осуда на полициската бруталност и со предлог мерки за надминување на насилните инцидент
Полицијата е многу специфична структура во државата.
Полицаецот е овластен од државата во име на граѓаните да го одржува редот и мирот, но пред сѐ – да ги брани човековите права и слободи (член 3 од Законот за полиција).
При вработувањето полицаецот потпишува изјава: „Се обврзувам дека во својата работа ќе ги почитувам Уставот, законите на Република Македонија и стандардите на полициската етика, совесно и уредно ќе ги вршам полициските работи и ќе ги почитувам основните слободи и права на човекот и граѓанинот гарантирани со Уставот, законите и ратификуваните меѓународни договори“ (член 100 од Законот за полиција).
За да ја извршува оваа функција, полицаецот има легално право да носи оружје и други средства за присилба, да употребува мерки на присила, да лишува од слобода, да ограничува движење, да легитимира, да претресува, …
Полицаецот зад себе ја има силата на најорганизираната структура во државата, соодветен тренинг кој го прави супериорен во однос на многу голем број од граѓаните, бенефиции поврзани со вршењето на службата заради спецификите на заканите со кои се соочува (член 101, 110, 111 од Законот за полиција), и, поддршката дури и во случаите кога ќе погреши: „Ако против полициски службеник се поведе или води кривична, прекршочна или парнична постапка, поради употреба на средство за присилба или за учество во сообраќајна незгода со моторно возило при вршењето на полициските работи, Министерството му обезбедува бесплатна правна помош“ (член 82 од Законот за полиција).
Ова право го нема ниту еден граѓанин во државата, и, ниту еден друг државен службеник.
Големата моќ која е ставена во рацете на полицаецот мора да биде врамена во законски ограничувања кои треба да обезбедат минимизирање на можноста за нејзина злоупотреба и затоа и најмал облик на злоупотреба мора да биде откриен и соодветно санкциониран.
Во спротивно, наместо структура која ги заштитува правата и слободите на граѓаните, полицијата ќе стане најмоќна банда која може да ги тероризира граѓаните.
Тепањето, клоцањето, удирањето боксови и шамари не се вброени во средствата за присила. Во ниту една ситуација. Под никаков изговор.
Тогаш кога полицаецот не може да се справи со граѓанинот со примена на законски предвидените средства за присилба (согласно член 35, 80, 83 од Законот за полиција) значи дека полицаецот не е соодветен за работата која што ја врши, дека нешто погрешил во предвидените процедури или пак, не функционирала организацијата која требало да му даде поддршка). И тоа е проблем кој треба да го реши државата, а не проблем кој значи дека полицаецот смее да излезе надвор од законски предвидениот начин на делување.
Било која споредба меѓу ситуацијата кога полицаец тепа граѓанин со онаа кога се нападнати полицајци, е несоодветна. Првата е едноставно недозволива, а втората е дел од специфичната опасност на која се изложени полицајците во изведувањето на своите задачи. И, секој оној кој ќе нападне полицаец едноставно треба да биде лишен од слобода, изведен пред суд и казнет со највисока можна казна (при што меѓу казните предвидени во нашиот Кривичен законик не постои казна тепање, клоцање, шамарање и удирање боксови).
Зголемениот напад на полицајци е сигнал дека не функционира како што треба организацијата која стои зад нив, и полицискиот синдикат треба да реагира и да бара соодветно функционирање на таа организација и поправање на грешките кои довеле до таква ситуација, а не ослободување од вина на оние кои го прекршиле законот и кои недостатоците во службата се обидуваат да ги надминат со незаконско насилство над граѓаните.
И јас очекувам полицискиот синдикат да го осуди секој облик на дискриминирачко однесување и постапување од страна на полицајците, да се спротивстави на структурната дискриминација кон одредена маргинализирана група и да побара посебни облици на комуникација со заедниците кон кои е забележена зачестена, па дури и системска употреба на сила.
Така полицијата станува структура во служба на граѓаните.
Сите права се задржани. ЛИНК: Услови за користење, авторски права и заштита на приватноста. Тесктот е личен став на Авторот.