Пукањето на веселби, особено во летниот период е зачестена појава и притоа се регистрирани и потешки инциденти. Полициски службеници, вчеравечер, го привеле гостиварецот Ш.К, (49) кој на свадбена веселба организирана во дворот од неговата куќа во населбата „Бањешница“, го нарушил јавниот ред и мир со пукање со пиротехнички средства. По целосното расчистување на случајот против него ќе следува соодветен поднесок.
Во саботата, полицијата го лиши од слобода 53-годишниот Б.Ф. во чиј дом се одржувала свадбата. Тој се сомничи дека пукал со огненото оружје при што беа ранети две жени.
Од СВР Тетово нагласуваат дека спроведуваат засилени контроли за откривање и законско санкционирање на „пукањата“ и приредувањето на огномети без одобрение.
Но, полицијата не беше толку ригорозна кога пред шест дена синот на пратеникот од ДУИ, Џевад Адеми и уште едно лице беа ранети на свадбена прослава во Мала Речица.
„На 30.7.2019 околу 22 часот, на свадбена свеченост организирана во дворот од куќата на 47-годишниот Б.Д, на улица „172“ во тетовска Мала Речица, од испукани куршуми од огнено оружје повреди здобиле 27-годишниот А.Б. од Мала Речица и 26-годишниот Ф.А. од Голема Речица. Јавен обвинител и екипа од Секторот за внатрешни работи Тетово извршиле увид и се преземаат мерки за целосно расчистување на случајот“, соопштија од МВР.
Вчера на свадбена свеченост што ја организирал гостиварец А.С. (45) на улица „137“ во Гостивар, бил нарушен јавениот ред и мир со пукање од огнено оружје. По извршениот увид, а А.С. повикан е во Полициската станица Гостивар за целосно расчистување на случајот.
Пукањето од огнено оружје на свечености е спротивно на Законот за прекршоци против јавниот ред и мир и се казнува со глоба 200 до 500 евра.
Во случаи со повредување и ранување тоа може да се третира и како кривично дело „предизвикување на општа опасност”, кое се санкционира со затворска казна од 1 до 5, односно 10 години.
Д.М.
