Полскиот претседател Анджеј Дуда денеска го потпишa контроверзниот закон за Холокаустот, кој предизвика остри реакции во Израел, Украина и САД.
Законот предвидува до три години затвор за оние кои го користат изразот „полските логори на смртта“ и кои изјавуваат „јавно и спротивно на фактите“ дека Полска или полскиот народ се соучесници во злосторствата на нацистичка Германија.
Овие делови од законот доведоа до дипломатска криза со Израел, кој стравува дека со ова Полска се обидува да ја скрие улогата на оние Полјаци кои учествувале во убиствата или депоратцијата на Евреите за време на германската окупација на Полска во Втората светска војна.
Одредбите на законот во кои се говори за активностите на украинските националисти во период од 1925 до 1950, пак, предизвикаа незадоволство во Укарина.
Стејт департментот го изрази разочарувањето на САД откако Дуда го потпиша Законот, кој, според Вашингтон, претставува „кршење на слободата на говорот и академската дебата“.
– Сфаќаме дека законот ќе биде подложен на оценка од страна на полскиот Уставен суд, но сметаме дека отворената дискусија за идеи, научни истражувања и образованието се најдобриот начин за борба против лажните изјави, стои во соопштението на Стејт департментот.
Извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
Одговорноста за редакциското опремување на текстовите (наслов, наднаслов, фотографија, тагови) е на ЦИВИЛ Медиа.