Центарот за европски истражувања и анализи ЕУРОПРОСПЕРА денеска одржа конференција на тема “Евроинтеграцискиот процес и правата на помалкубројните заедници во Република Северна Македонија – предизвици, предности и перспективи“.
На конференцијата учествуваа претставници на невладините организации на помалкубројните заедници – Диванхана, УФУК, Заедница на Хрвати во Република Северна Македонија и Здружението за права и хуманост ИНТЕГРА НАУ.
На конференцијата учествуваше и заменик-директорот на Агенцијата за остварување на правата на заедниците (АОПЗ) г-дин Џелал Хоџиќ. Конференцијата е организирана во склоп на проект поддржан од Агенцијата за остварување на правата на заедниците (АОПЗ).
Од конференцијата произлегоа сет клучни точки, меѓу кои дека помалкубројните заедници во нашата држава даваат силен придонес во развојот на демократијата, економијата, културата, науката, образованието, спортот, како и во сите други сфери на општеството.
„Помалкубројните заедници ја чувствуваат Република Северна Македонија за своја држава и силно се залагаат за остварувањето на стратешките цели на државата, како што е полноправното членство во Европската унија.
Сметаме дека забелешката на Европската унија дека институциите треба да се посветат кон овозможување на поголема вклученост на претставници на помалкубројните заедници во креирањето на политиките треба да се земе предвид и да се делува во насока на овозможување на вклученост што поскоро. Вклученоста на оваа група на граѓани носи кон поголема видливост и остварување на нивните цели и потреби.
Исто така, вклучувањето на помалкубројните заедници и инклузивното креирање и имплементирање на политиките го зголемува потенцијалот за развојот на државата и сите сфери на општеството.
Без разлика на различните јазици, култури, обичаи, традиции, помалкубројните заедници имаат потенцијал да се обединат околу развојот на државата, негувањето на различностите, зголемувањето на демократскиот капацитет на општеството и остварувањето на стратешките цели на државата, како што е членството на Република Северна Македонија во Европската унија.
Сметаме дека членството на Република Северна Македонија во ЕУ и реформите кои како држава ќе ги направиме на тој пат, значително ќе ги зголемат капацитетите на администрацијата и услугите кон граѓаните, демократските вредности ќе бидат посилни, економијата многу поразвиена, инклузивноста на помалкубројните заедници дополнително подобрена.
Имајќи ги предвивд овие факти, ЕУРОПРОСПЕРА како невладина организација која силно се залага за демократизација, инклузија и европски вредности и невладините организации на помалкубројните заедници, на денешната конференција се обврзаа да се координираат на теми поврзани со патот на Република Северна Македонија кон ЕУ со цел директно придонесување во остварувањето на стратешките цели на државата, зајакнување на демократските вредности, развивањето на економијата, инклузија на помалкубројните заедници и негување на нивната култура и различности“, се наведува во соопштението од ЕУРОПРОСПЕРА.