Пописот на населението, домаќинствата и становите во Северна Македонија ќе се спроведе од 1 до 21 април оваа година, а за негова доследна реализација ќе биде изготвена методологија и други пропратни документи. Конечната одлука за одржување на пописот во земјата, прв по 19 години, беше потврдена со вчерашното гласање во Парламентот, зад кое, како што најави, не застана најголемата опозициска партија ВМРО-ДПМНЕ.
Собранието вчера со 62 гласа „за“, без „против“ и „воздржани“ го усвои Законот за попис. Вчера само се гласаше за законот, а расправата заврши на 15 јануари, кога немаше кворум за гласање.
Согласно Законот, податоците добиени од пописот на населението, домаќинства и становите во Република Северна Македонија во 2021 ќе се користат за креирање на развојни политики, макроекономски планирања, научни и други истражувања и статистички цели. Индивидуалните податоци од пописот може да се користат за воспоставување, водење и ажурирање на статистичките регистри кои се во надлежност на Државниот завод за статистика, согласно закон. Ќе се попишува и резидентното и нерезидентното население.
Личните податоци добиени со пописот подлежат на заштита согласно одредбите од овој закон, Законот за државната статистика и прописите од областа на заштита на личните податоци.
Пописот ќе се спроведе со употреба на пренослив компјутер, на посебна апликација, при што задолжително се применуваат технички и организациски мерки согласно прописите од областа на заштита на личните податоци.
Премиерот Зоран Заев во средата, на ден пред гласањето во Парламентот, на прес-конференција уште еднаш потенцираше дека пописот е статистичка операција, а не политичка како што сака да се претстави, уверувајќи дека податоците ќе бидат реални. Тој побара од опозицијата да не повикува на бојкот, потсетувајќи дека граѓаните се законски обврзани да се попишат.
Вицепремиерот за борба против корупција и криминал, одржлив развој и човечки ресурси, Љупчо Николовски по гласањето со објава на Фејсбук повтори дека со усвојувањето на Законот за попис на населението се создадени нормативните услови да се реализира оваа важна статистичка операција после 19 години.
„Институциите се подготвени, ќе имаме попис по меѓународни стандарди. Концептот е професионален и одговорен, без политички влијанија, да имаме точни, веродостојни статистички податоци и да го спроведуваат стручни лица. Според критериумите на Евростат и меѓународните стандарди“, наведува Николовски.
Според него, партизирањето на пописот е штетно и целосно непотребно, бидејќи тоа е статистичка операција, која е неопходна за да се планира развојот на државата.
„Нашата држава повеќе не може да си дозволи „луксуз“ и да остане без попис уште неколку години. Дотолку повеќе што државите членки на Обединетите Нации се обврзани спроведуваат попишување на населението и имотот“, истакна министерот за правда Бојан Маричиќ на онлајн-конференцијата во организација на „Рома Интеграцион Центрум“ и го поздрави донесувањето на Законот за попис во Собранието.
Министерот кажа дека е време да се престанеме да се гледа на пописот како на политичко прашање, кое служи само за да се пребројат етничките заедници во нашата земја и како општество да се фокусираме на тоа како пописот може да биде своевиден катализатор на развојот на државата и планирањето на политиките, особено за најранливите категории на граѓани.
„Без да знаеме колку точно жители има некој град, село или населено место, што точно работат, какво образование имаат, со каков имот располагаат, што точно им е потребно, нема да можеме да креираме долгорочни развојни политики и да имаме соодветен слух за потребите на сите граѓани“, изјави Маричиќ.
Министерот порача дека покрај населението со потписот ќе се попишат и нашинците во странство, односно дијаспората, а во Заводот за статистика веќе се изработува и посебна промотивна кампања преку која на овие лица детално ќе им се објасни како да учествуваат во процесот, за сите да можат да го искористат своето право.
Тој на онлајн конференцијата организирана од страна на „Рома Интеграцион Центрум“, посочи дека Министерството за здравство и Комисијата за заразни болести се на располагање за едукација и донесување на протоколи за спроведување на оваа статистичка операција.
Координаторот на пратеничката група на ВМРО-ДПМНЕ, Никола Мицевски вчера повторно го изнесе ставот на партијата особено по, како што рече, изјавите за проценти, по што оцени дека пописот нема да биде објективен и фер, нема да биде релевантен и реален.
„Последниве денови се лицитира со проценти и признавање и односно непризнавање на резултатите од пописот, што ми дава за право да констатирам дека нашите забелешки се оправдани и дека повеќето забелешки меѓу кои и врзаниот потпис на директорот и заменикот има некаква улога во ова законско решение и дека пописот од статистика преминува во политичка операција. Затоа од име на коалицијата предводена од ВМРО-ДПМНЕ констатираме дека ваквото предложено законско решение нема да биде објективно и фер. Пописот нема да биде релевантен и реален попис“, рече Мицевски.
