ЏАБИР ДЕРАЛА
Седиштето на ЦИВИЛ е мета на уште една провална кражба. Или барем така изгледа. Ова е трет поголем инцидент за пет години. И по третпат, констатираме дека ова не е обичен инцидент. И некако се поклопуваат со интересни настани и процеси во земјава. Се консултиравме со искусни професионалци во областа на безбедноста и заклучивме дека сме во право – нешто не е како што треба.
Првиот инцидент се случи непосредно по крвавите настани на 27 април 2017 година, кога од седиштето на организацијата беа украдени шест лаптопи и хард дискови со електронска документација на организацијата. Мојата документација и нотесите беа прелистувани уредно, а ми беше украдена и електронска архива. Сепак, овој напад не беше целосно успешен. Најчувствителните податоци, како во електронска, така и во хартиена форма се чуваат на сосема безбедно место, така што напаѓачите и не се „офајдија“ многу од тој дел од нивната „мисија“.
Вториот инцидент беше повеќе од очигледен. Се случи на крајот на јуни, 2020 година, во екот на мониторингот на предвремените парламентарни избори. Тогаш, седиштето на ЦИВИЛ беше вандализирано, но само однадвор. Паното со ознаки на организацијата во дворот беше превртено, а врз него беше ставена лопата. Влезната врата на седиштето беше оштетена со остар предмет и беше изгравиран зборот Nazi. Пред влезната врата беа истурени отпадоци.
Не сакам да прејудицирам, барем додека трае истрагата, но ќе ја искористам оваа прилика уште еднаш да ја потсетам јавноста и институциите на големите предизвици со кои се соочуваат прогресивните организации и редакции. Што се однесува до документацијата, ние немаме тајни. Сите податоци за нашето работење се јавни, доволно е да се отворат нашите интернет портали, а отворени сме и за секое дополнително прашање. Нема потреба да се провалува, освен ако целта не е да се упати поинаква порака.
Нападот е апсурден во смисла на добивка. Доколку целта е и да се блокира работата на ЦИВИЛ, да му се упати закана, да се заплаши, целта не е постигната. Токму така, пораката е примена, но целта не е постигната. Можеби само малку изгубивме време да повикаме полиција, да составиме записник и да напишеме соопштение. Тоа е загубата. Од друга страна, добра прилика да поразговараме и да ги збиеме редовите уште повеќе.
Познато е дека во текот на изминатите десет и повеќе години, тимовите на ЦИВИЛ и редакцијата Цивил Медиа се соочуваат со бројни притисоци, клевети, говор на омразата и смртни закани. Мотивите се познати, нарачателите, исто така. Нашите иницијативи за промоција на за човекови права и слободи, еднаквоста, правдата и мултикултурализмот, а особено борбата против дезинформациите и пропагандата имаат силен и позитивен ефект во јавноста и во општеството. Јасно е и дека нашата работи им пречи на познати структури во земјава и во странство.
Но треба да знаат – ние не се плашиме. Нам заканите и притисоците ни се мотив повеќе да продолжиме со работа, бескомпромисно и гласно.
Во името на ЦИВИЛ, им благодарам на сите изрази на солидарност и понуди за помош.