Почитувани и драги пријатели, луѓе, сограѓанки и сограѓани, би сакал да ве известам дека од денес во јавноста ќе ме гледате во мојата нова улога, посебен советник и дел од кабинетот на министерот за култура, Роберт Алаѓозовски.
Поканата на новиот министер ја прифатив со големо задоволство и без многу двоумење. Верувам дека ги претпоставувате главните причини зошто ја прифатив оваа одговорна задача, но чувствувам должност, кон јавноста воопшто, како и кон оние драги луѓе кои го следат и поддржуваат моето јавно дејствување сите овие години, да дадам мало објаснување за моите мотиви да го променам начинот на моето досегашно дејствување и да бидам дел од тимот кој ќе раководи со Министерството за култура.
Најпрвин, главната причина е мојот респект кон Роберт Алаѓозовски, со кого се познавам речиси 25 години. Неговите капацитети, креативност и големо познавање на областа воопшто, а и на независната културна сцена, ми влеваат реална надеж за суштински промени и подобрувања во нашиот културен и уметнички живот.
Секако, голем удел за почетокот на нашата соработка има и заедничкиот интерес кон реге музиката, растафаријанската култура, рокенролот, урбаната култура и уметност. Бидејќи и самиот ѝ припаѓам на независната уметничка сцена и ги имам почувствувано на своја кожа сите проблеми и аномалии со кои се соочува речиси секој независен уметник, решив во одреден период да поднесам мала жртва околу мојата независност, за да им помогнам на луѓето од таа бранша, да добијат поддршка и услови за да творат уште послободно и понезависно. Се надевам дека со новиот тим ќе придонесеме таа сцена и алтернативните уметнички изрази да добијат поддршка во вистинска насока, да се оттргнат од маргините на интересот на институциите, да се развиваат и да заживеат на вистински начин.
Мотив и предизвик е секако и состојбата со културата на Албанците, но и на останатите заедници во земјата, кои честопати беа жртва на етноцентристичките политики на претходната власт. Во таа насока, ќе се обидам, заедно со целиот тим предводен од министерот Алаѓозовски, да придонесам за градење на достоинствен однос, почитување и грижа за културното наследство и културното творештво на сите граѓани на земјава подеднакво.
Секако, фактот што овој тим е дел од новата Влада предводена од Зоран Заев и луѓето со кои со години се боревме заедно против еден недемократски и автократски режим, претставува голем поттик да се вклучам и да бидам дел од промените кои ќе ја придвижат Македонија напред во секој аспект, по долги години назадување и уништување на речиси сè што е вредно.
Поголемиот дел од моите должности ќе бидат поврзани со комуникациите на Министерството со јавноста. На колегите од медиумите им ветувам фер и професионален однос и соработка, како и максимална транспарентност. Наместо нарачки на прилози, јавувања и притисоци врз новинари, од овој тим можете да очекувате само отворени врати и вистински одговори кон јавноста во секое време.
Се надевам на вашето искрено разбирање и поддршка за овој мој чекор. За возврат, можете да очекувате дека нема да се мрднам ниту милиметар од моите етички начела и принципи, од заштитата на интересите на граѓаните. Како досега, така и отсега. Секогаш, останувам ваш!
