Последен ден од изборната кампања за локални избори. Последна надеж на кандидатите за градоначалник, до пред полноќ, да ги убедат граѓаните да гласаат за нив. Последниот ден од кампањата, политичките партии како да го резервирале за оцрнување на притивниците со тоа што на прес-конференции вадат документи за осудување, криминал, незаконско богатење, недомаќинско работење и менаџирање, како и обвинувања за поткуп на гласачи…
ПОЛИТИЧКИ ПАРТИИ
ДУИ
Портпаролот на Демократската унија за интеграција (ДУИ), Бујар Османи, вели дека оваа кампања беше најдемократска кампања досега. Тој додава дека тоа што го прави ДУИ е дека ги предизвикува стереотипите. ДУИ наметнува теми, ДУИ отвора теми коишто ја растоваруваат државата од ретроградни погледи коишто ја држеа назад.
„Не е важна националноста, туку е важна еднаквоста. Националноста е важна доколку оневозможувате некому заради неговата националност да биде на одредена позиција во државата. Нашиот концепт е постигнување на целосна рамноправност и еднаквост на сите граѓани и на сите етнички заедници. Овој процес го реализиравме и продолжуваме да го реализираме и до сега изградивме куќа во која што сите сме рамноправни. Сега таа куќа треба да ја направиме убаво место за живеење“, истакна денеска портпаролот на Демократската унија за интеграција (ДУИ), Бујар Османи коментирајќи ја најавата на лидерот на партијата Али Ахмети за избор на „претседател на државата Албанец”.
СДСМ
Од СДСМ велат дека останаа уште 2 дена до нивната голема победа!
„Во недела граѓаните ќе го кажат своето, ќе ѝ дадат ветер во грбот на својата земја, ќе ја поттурнат напред и ќе им го покажат грбот на деструктивните сили. Секој го гледа нашиот труд последниве години за да ја унапредиме државата и квалитетот на животот на нашиот народ. Сѐ што правиме, на крајот е за една цел – повисок економски стандард на нашиот народ. Да си ги задржиме младите тука, да има повисоки плати и пензии, да има поквалитетен живот за сите. Во тоа име ве повикувам на 17 октомври да излеземе масовно Албанците, Македонците, Турците, Ромите, Бошњаците, Власите, Србите, сите да гласаме за најдоброто, затоа што на крајот сепак победува најдоброто!“, велат од СДСМ.
ВМРО-ДПМНЕ
Од ВМРО-ДПМНЕ велат дека власта е свесна дека им се одбројани деновите, и затоа единствена работа којашто им преостанува да прават е масовен поткуп.
„Ние во наши раце ја немаме полицијата на Спасовски, го немаме обвинителството на Русковска, но во наши раце имаме нешто што тие го немаат, а тоа е народот. На овие избори на 17 октомври ќе победи најголемата коалиција што некогаш се формирала во независна Македонија, тоа е коалицијата на ВМРО-ДПМНЕ со народот. Нивното, драги пријатели, заврши. Крајот се гледа. Многу помина, а малку остана, денови се во прашање. Се обидоа да нè понижат, но не им дозволивме. Се обидоа да нè манипулираат, не им дозволивме. Се обидоа да нè поделат, повторно не им дозволивме. Затоа, излезете масовно и гласајте“, велат од ВМРО-ДПМНЕ.
ЗЕЛЕН ХУМАН ГРАД
Од ЗХГ се залагаат за енергетска независност и борба против енергетска сиромаштија.
“Бесплатната сончева енергија мора да се користи за производство на електрична енергија или топла вода во сите 42 јавни објекти под надлежност на Град Скопје. Тоа се 21 средно училиште, 1 административно општинска зграда, 7 културни институции, 5 објекти на противпожарната бригада и 8 јавни претпријатија. Во нив треба да се идентификуваат и спроведат мерки за заштеда. Се со цел оптимизирано осветлување, затоплување, проветрување и климатизација, како и термоизолација на ѕидовите и покривите“.
Реакција на ИВЗ за злоупотреба на религијата за политички цели
Исламската Верска Заедница на Република Северна Македонија најостро ја осудува злоупотребата на повикот за молитва – Езанот и молитвата за политички цели, на кандидатот за градоначалник на општина Шуто Оризари, Тефик Махмут од Левица.
„Вчера пред Владата бевме сведоци на политички митинг, каде што беа злоупотребени исламските верски обреди – исмејување на езанот и намазот за политичка цел. Остануваме со надеж дека таквите примитивни дејствија – со злоупотреба на религијата, нема да се повторат во иднина“, велат од ИВЗ.
Д. Муратов
