Предлог законот за Јавно обвинителство денеска помина во матичната собраниска Комисија за европски прашања. Откако членовите на Комисијата ги разгледаа Предлог законот за Јавно обвинителство и Предлог законот за изменување и дополнување на Законот за Советот на јавни обвинители, по скратена постапка, и одлучија да ги проследат во натамошна постапка, односно тие да одат на пленарна седница.
На текстот на законот за ЈО имаше само еден амандман поднесен од пратеникот Сурија Рашиди, кој министерката за правда Рената Дескоска не го прифати и не беше усвоен од мнозинството во Комисијата.
Министерката Дескоска образложувајќи го Предлог законот за Советот за јавни обвинители, рече дека никој не треба да има дилема дека членот 110 се однесува на материјалите од прислушуваните разговори кои се преземени од Специјалното јавно обвинителство.
На седницата на собраниската Комисијата за европски прашања на која се разгледуваше Предлог-законот за јавно обвинителство, пратеникот од ВМРО-ДПМНЕ, Антонио Милошоски презентира писмо, аудио снимка и транскрипт за, како што наведе, разговор на лицето З.З. во врска со Боки 13.
Според него, оваа снимка покажува зошто некој не сака нелегално снимени разговори да бидат доказ во судски постапки. Тој пред пратениците ја пушти аудио снимката, а потоа го прочита и транскриптот.
Министерката за правда, Рената Дескоска на ова одговори дека лично ги повикува ЈО доколку има докази, па дури и индиции за сторени кривични дела да отвори постапки и да ги процесуира.
Премиерот Оливер Спасовски денеска не сакаше да ја коментира снимката што на собраниска комисија ја објави пратеникот Антонио Милошоски, за која рече дека е поврзана со случајот „Рекет“. Спасовски кусо порача дека за „Рекет“ се води постапка што треба да заврши и секој што постапувал незаконски да одговара за тоа што го направил.
За предлог-законот се изјаснува и Законодавно-правната комисија, а по комисиската расправа, за предлог-законите треба да се расправа и на пленарна седница на Собранието, која што уште не е закажана.
Од ВМРО-ДПМНЕ, бараат да се прифати нивниот предлог за распуштање на Собранието и да се распишат избори, а Христијан Мицкоски изјави дека не гледа причина ВМРО-ДПМНЕ да биде во Собрание, бидејќи не се прифаќа нивното барање Собранието да се распушти денеска, и дека ќе имаат Извршен комитет на кој ќе дискутираат по ова прашање.
Собранието требаше да се распушти денеска, на 60 дена пред одржување на изборите. Партиите на лидерска средба кај претседателот Стево Пендаровски во октомври, откако земјата не доби датум за почеток на преговори, се договорија на 12 април да се одржат предвремени парламентарни избори. За таа цел беше избрана и техничка влада на 100 дена пред изборите, која треба да организира и спроведе изборен процес, но по консултациите со ДИК, претседателот на Собранието Џафери одлучи собранието да се распушти на 16 февруари, до кога се очекува конечно да се донесе Законот за ЈО.
Дијана Тахири
