Министерството за образование и наука известува дека од почетокот на учебната година, 1 октомври, бројот на учениците кои следат онлајн настава е зголемен за околу 10% и дека за неполна недела околу 80% од учениците во средните и основните училишта успешно се приклучиле кон онлајн наставата и дека процентот од стартот на годината постојано се зголемува.
„Останатите, учениците и наставници во основно и средно образование, пријавиле дека имаат тешкотии при вклучување во онлајн наставата, а како најчеста причина ги посочуваат – лошата интернет конекција или немањето уреди. Министерството за образование и наука е во координација со градоначалниците, локалните самоуправи и директорите на училиштата и се работи на надминување на овие предизвици“, стои во соопштението на министерството.
Од министерството информираат дека моделот за онлајн настава се покажала функционална и успешна и дека наставниците и учениците се задоволно од тоа како се одвивала наставата од далечината.
98% од учениците од 1-3 оддление следат настава со физичко присуство во училиштата, а помалку од 2% учат од далечина, информираат од министерството.
„За учениците коишто немаат уреди за онлајн учење, а сепак треба да учат на далечина успешно се емитуваат 15 минутни часови на телевизија преку Националната радио телевизија. Исто така, наставниците имаат обврска да им печатат материјали и редовно да им ги доставуваат, но и да бидат во постојана комуникација со нив и нивните семејства, за да го следат совладувањето на наставниот материјал“, велат од министерството за образование.
Министерката за образование и наука, Мила Царовска, истакна дека владините одлуки се во интерес на заштита на јавното здравје и дека ќе има санкции доколку не се почитуваат истите.
„Владините одлуки се во интерес на заштита на јавното здравје и секако дека ќе има санкции доколку не се почитуваат истите“, изјави Царовска.
Професорот Ајет Реџепи во изјава за ЦИВИЛ Медиа истакна дека големината на Националната платформа за далечинско учење е тоа што е заедничка за сите основни и средни училишта, околу 270 илјади корисници. Според него очекувањата се големи, но истовремено постои и одреден страв кај новите корисни.
„Можно е поради обемноста на сево ова да има на почеток одредени потешкотии од технички аспект, но сето тоа ќе се решава брзо и во од. Сепак мислам дека многу повеќе треба тема на дискусија да бидат продобивките од платформата, а се помалку стравот и скептичноста од имплементација на овој и ваков проект. Платформата како таква ќе се применува уште долго без оглед на ситуацијата и можноста за физичко присуство на учениците. Така да придобивките ќе бидат далекусежни. Мислам дека за месец до два сите до толку ќе привикнеме на неа што ќе ни биде многу тешко да работиме без неа дури и ако продолжиме со настава со физичко присуство“, смета професорот Реџепи.
Наставничката Билјана Николова во однос на Националната платформа за учење од далечина, во изјава за ЦИВИЛ Медиа, вели дека тоа е образовна платформа која е прилагодена соодветно на нашиот образовен систем и која ги обединува на едно место учениците, наставниците и сите потребни програми кои се потребни за реализација на наставниот процес.
„Јас лично сметам дека во периодот кој следува Националната платформа ќе ни овозможи еден стабилен и континуиран процес на онлајн учење. Самата платформа е богата со многу активности и ресурси, кои би им помогнале на наставниците да креираат интересни и интерактивни содржини за своите ученици. Искрено се надевам дека процесот на прилагодување на Националната платформа и онлајн наставата ќе биде брз и лесен за сите чинители на учењето на далечина“, додава Николова.
А. П.
