Преглед на настани: Еврокомесарот Вархеји во Скопје по Извештајот на ЕК, протести во неколку градови…

ВЕСТ НА ДЕНОТ: Пендаровски-Вархеји: Извештајот на ЕК дава детален приказ на состојбите во државата и степенот на реализација на реформите

Претседателот Стево Пендаровски денеска го прими Комесарот за соседска политика и преговори за проширување на Европската Унија, Оливер Вархеји. Комесарот Вархеји на претседателот Пендаровски му го предаде Извештајот на Европската комисија за Северна Македонија за 2020 година.

На средбата беа разменети мислења за клучните наоди во објавениот извештај.

Заблагодарувајќи се за ангажманот на комесарот Вархеји и неговата цврста поддршка на перспективата за проширување на Европската Унија со земјите од Западен Балкан, претседателот Пендаровски истакна дека Извештајот дава детален приказ на состојбите во државата и степенот на реализација на реформите. Според претседателот Пендаровски, извештајот на комисијата дава поттик за натамошно интензивирање на реформската агенда во сите сфери посочени во документот и претставува чекор кон формален почеток на пристапните преговори за членство за време на германското претседателство со ЕУ, до крајот на годината.

Претседателот Пендаровски го поздрави претставениот Економски и инвестициски план за Западниот Балкан, што има за цел да го поттикне долгорочното економско закрепнување на регионот, што е дополнително отежнато поради пандемијата од КОВИД-19, а во функција на забрзување на интеграцијата во Европската Унија. Со претставениот план, според претседателот Пендаровски, се потврдува дека иднината на целиот регион е во Европската Унија, а Брисел јасно демонстрира дека регионот е нејзин геостратешки приоритет.

ИЗЈАВА НА ДЕНОТ

Посетата на Скопје на еврокомесарот Оливер Верхеји доаѓа веднаш по вчершното објавување на два извештаи на Европската комисија, едниот како оценка на Северна Македонија, а другиот економскиот инвестициски план за развој на земјите од Западен Балкан. На заедничката прес-конференција со премиерот Зоран Заев, Вархеји истакна дека економскиот план е регионален и дека треба да им помогне на земјите подеднакво, како и прашањето на ромската заедница и нивниот потенцијал за придонес во економијата.

ЦИВИЛНИ АКТИВНОСТИ

Во пресрет на утрешниот фудбалски натпревар меѓу Северна Македонија и Косово, ЦИВИЛ упатува апел до сите навивачки групи да се воздржат од ширење на говор на омраза или насилство кои навивачките групи ги промовираат континуирано и со години.

ЦИВИЛ се залага за општество во кое владее слободата, еднаквоста и правдата, општество во кое граѓанките и граѓаните се чувствуваат безбедни и имаат доверба во институциите, каде што безбедноста, слободата на движењето и слободата на изразувањето се гарантираат со закон и со ефикасно функционирање на системот.

Зелен ЦИВИЛ во Велес и Кавaдарци разговараше со граѓанките и граѓаните на тема социјална правда, но и за антинационализмот.

ФЛЕШ ВЕСТИ

Земјата е на добар пат и треба да продолжи со имплементација на веќе донесените закони и постоечки механизми. Јас како премиер заедно со министрите од анализата на наодите од Извештајот на Европската комисија ќе ги искористиме укажувањата на ЕК за проверка на нашите акциски планови и стратегии од првиот кластер од поглавјето за преговори посветен на темелните вредности, порача денеска премиерот Зоран Заев на заедничката прес-конференција со еврокомесарот за проширување Оливер Вархеји кој е во посета на Северна Македонија.

Од Министерството за внатрешни работи информираат дека се преземени сите потребни мерки за беспрекорна организација и одигрување на фудбалскиот натпревар од полуфиналето од Лигата на Нации помеѓу фудбалските репрезентации на Северна Македонија и Косово на 8-ми октомври (утре) на Националната арена „Тодор Проески“ во Скопје.

Попладнево пред Владата на Република Северна Македонија започна протестот на музичарите, сопствениците на ноќните клубови и угостителите од рестораните за семејни прослави против рестриктивните мерки на кои ги донесе Владата со цел да се спречи ширењето на коронавирусот, а се однесуваат на угостителските објекти.

Средношколците од Тетово и Куманово протестираа за враќање на училишните клупи.

Здружението на граѓани Театарска Работилница Прилеп оваа година на 10 Октомври по 10 пат ќе ја реализира литературната манифестација „Поетски Слем Македонија 2020“, која редовно се одржуваше во ЈОУ Градска библиотека „Борка Талески“ во Прилеп, а овој пат на Летната сцена при НУЦК Марко Цепенков.

СЛОБОДНА ЗОНА

Сашо Орданоски во колумната „Изгубени во преводот“ пишува: „Зошто нашата опозиција се срами, или можеби не сака, да ги поздрави меѓународните успеси на Македонија? Што им пречи, покрај десетте жестоки, невротични плукања дневно по власта – дури и да не се, барем половината, лиферување лажни вести и измислици – да се обратат со охрабрување до нацијата, нешто да честитаат кога е, објективно, за поздравување? Та, нели сечат вени кога секаква шуша (меѓу другите) од Бугарија ни го негира националното постоење, особено јазикот? Зошто што рекол некој од Пловдив или од Велико Трново, на пример, им е поважно од тоа што го направила најголемата меѓународна организација во Европа од официјалната говорница во Брисел“?!

„Од забелешките и препораките содржани во годишните извештаи на ЕК, од ОБСЕ за изборите и од резолуциите на Парламентарното Собрание на СЕ, искуството од минатото покажува дека државата и граѓаните на Македонија немаат голема корист.

Власта нив само еден или два дена ги чита и ги истакнува само позитивните оценки, а ги премолчува негативните. Понатаму се тече по старо“, поентира Џевдет Хајредини.

Д. Муратов