Вест на денот: Пратениците го изгласаа законското решение со што се овозможува влез на вакцините за Ковид-19 во земјата
Со 70 гласа „за“ Собранието на Република Северна Македонија денеска го донесе Дополнетиот Предлог на законот за изменување и дополнување на Законот за лековите и медицинските средства, по скратена постапка, со што се создаваат услови за увоз на вакцини за Ковид-19 во земјата. Законот беше поддржан и од опозоциските пратеници, кои и покрај тоа изнесоа низа критики за доцнењето на вакцините во земјата.
Во Дополнетиот Предлог на законот за изменување и дополнување на Законот за лековите и медицинските средства, по скратена постапкасе прецизира дека за ставање на вакцина за SАRS COV 2 во промет, покрај претходно предвидените правни лица, барањето може да го поднесе и производител на лекови со регистрирано седиште надвор од територијата на Република Северна Македонија, правен застапник на странски производител со регистрирано седиште надвор од територијата на Република Северна Македонија, подружница на странски производител со регистрирано седиште надвор од земјава и трговско претставништво на странски производител со регистрирано седиште надвор од територијата на Република Северна Македонија.
Изјава на денот– Царовска: Сексуално образование во второ одделение е лажна вест, да се следат официјалните информации
-Многу интересно е што дебатите ги водат луѓе коишто во континуитет во нашата држава шират лажни вести. Токму затоа ги поттикнувам граѓаните да ги следат официјалните канали на Владата и на Министерството, и да донесуваат одлуки. Ако се сеќавате истите тие кажуваа дека во источниот регион ќе се населат 120 000 мигранти, се сеќавате како пропадна таа лажна вест, па после тоа имаше нешто со 5Џи врапчињата итн, па следната лажна вест беше дека се укинува историја, па следната лажна вест беше дека се укинува македонски јазик. Истите тие луѓе денес зборуваат дека ќе имаме сексуално образование во второ одделение, користејќи снимки, слики од сосема други држави, коишто се во регионот и пред неколку години направиле такво воведување, а во нашата држава тоа не е вистина, рече Царовска која денеска беше во Штип на дебата за реформи во средното стручно образование.
ФЛЕШ ВЕСТИ
93 граѓански организации изразија поддршка за приоретизирањето на родовата рамноправност и на заштитата од дискриминација и насилство во предлог-концепцијата за реформи во основното образование.
Марк Цукерберг на својот Фејсбук профил ги сподели заклучоците и квартални резултати на Фејсбук. Цукерберг истакнува дека во фокусот за оваа година ќе бидат четири големи теми заедници, приватни пораки, трговски алатки за мали бизниси и градeње на следната компјутерска платформа.
Матурантите и оваа недела нема да се вклучат на наставата. Тие уште стојат на ставот дека се потребни измени во полагањето на државната матура, поточно да се полага со скратена наставна програма. Од ресорното Министерство пак се децидни – бојкотот е неоправдан и е на штета на матурантите.
Евроамбасадорот Дејвид Гир денеска го посети Собранието на Република Северна Македонија.
Универзитетот „Св. Климент Охридски“-Битола и Фондот за иновации и технолошки развој (ФИТР) ќе воспостават поинтензивна соработка за поврзување на знаењето, науката и иновациите. Тоа денеска го договорија проректорот на УКЛО Марјан Ѓуровски и директорот на ФИТР, Коста Петров.
Новоизбраниот Народен правобранител Насер Зибери денеска даде свечена изјава во Собранието. „Сметам дека мојот досегашен ангажман е доволна гаранција за успешно извршување, согласно закон и уставот на оваа многу важна функција за граѓаните на државата“, изјави Зибери.
СЛОБОДНА ЗОНА
„Дали е можно? Добро ли читаме? Оваа кандидатка за фотелја во македонскиот законодавен дом, според наведеното, го оправдува сексуалното насилство, силувањето – директно и отворено! Навистина, дали е можно? Дали погрешиме ако заклучиме дека овој партиски „крем“ го одразува ставот на партијата? Дали партијата ќе излезе со официјален став по ова прашање во парламентот? Се разбира, откако ќе се задоволат сите финансиски апетити на нивниот шеф за кого некои автори го креираа и хаштагот #ЛеваРукаДесниЏеб?“, Блиц коментар на Џабир Дерала – Освен стрелањето, Левица го оправдува и сексуалното насилство?
„Аџамиите што во крајот на осумдесеттите мислеа дека го менуваат светот, некритички прифаќаа сѐ што доаѓаше од шарениот свет на западните држави. Па оној што имаше два пара чевли (едни за работа и едни за пред свет) сосема нормално прифати да има десет пара, натрупани по плакарите, а носи еден, два пара зашто во тие разгазените најдобро се чувствува“, пишува Војо Маневски во колумната Аџамија.
„Секоја недела гнасотии колку сакате. Цела машинерија финансирана од Будимпешта исклучиво наменета за компромитации и дискредитации, најчесто со бесмислици што можат релативно лесно да се проверат и едноставно да се демантираат. Ако ви се демантира – државните институции ја имаат таа обврска, а и капацитет.“, пишува Сашо Орданоски во колумната „Гнасите маршираат, во погрешен правец“.
„Периодот на четиригодишното владеење на Трамп уште долго ќе биде под опсервација на политичките аналитичари, безбедносните служби и психолозите, затоа што феноменот на Трамп нема јасна идеолошка матрица, но според случувањата во Капитол има јасни теркови и „спонзори“ според кои се движело неговото владеење.“, пишува Александар Н. Писарев во вториот дел од анализата (ДОСИЕ) Изборите во САД: Сенка врз американска демократија (2)
Д. Тахири
