ВЕСТ НА ДЕНОТ
Во Брисел денеска се одржува Самит на НАТО, на кој Северна Македонија ќе ја претставува премиерот Зоран Заев. Ова е прва средба на шефовите на држави или влади на членките на Алијансата на која Северна Македонија учествува како полноправна членка на НАТО. Целта на генералниот секретар на НАТО, Јенс Столтенберг е лидерите да се усогласат за „амбициозна“ агенда за 2030-та година во однос на безбедноста и одбраната.
Сајбер безбедноста, климатските промени и секако зголемувањето на буџетските стапки на земјите членки за одбраната, се меѓу најважните теми на дискусија. Односите со Русија и Кина, исто така, се меѓу клучните теми за разговор, посебно како НАТО да се постави во однос на подемот на овие две светски сили.
ИЗЈАВА НА ДЕНОТ
„Сите ние лидерите на НАТО и на земјите-членки сме согласни дека ниту една земја или континент не може да се справи сама со овие предизвици. Трансатлантското единство и солидарност се од витално значење за да се одржат нашите нации безбедни. Сега имаме историска можност да ја зајакнеме врската меѓу Европа и Северна Америка и да го подготвиме НАТО за иднината и затоа иницијативата НАТО 2030 за продолжување на адаптацијата на нашата Алијанса е во срцето на Самитот“, наведува Заев.
ФЛЕШ ВЕСТИ
СУДСТВО Министерот за правда Бојан Маричиќ на заедничка прес-конференција со претседателот на Здружението на судиите Џемали Саити, изјави дека е постигната согласност за зголемување на платите на судиите за 15 отсто.
РАЗЛИЧНОСТИ Менување на јавната свест која што почнува од семејството, од дома, реформи во образовниот процес уште од најмала возраст и во претшколските и во школските установи, медиумите, промени во политичкиот систем се дел од заклучоците кои призлегоа од денешната панел дискусија „Обединети во различностите: Рамноправност и недискриминација во Република Северна Македонија“, во организација на Центарот за европски истражувања и анализи – ЕУРОПРОСПЕРА.
ДИВОГРАДБИ Започна уривањето на платформите во Струга. Концесионерите сами ги демонтираат објектите по налог на општината. Градоначалникот, кој денес заедно со вицепремиерот Артан Груби извршија увид на крајбрежјето, најави дека ќе се отстрануваат шест платформи за зачувување на статусот на регионот под УНЕСКО.
ВАКЦИНАЦИЈА Вакцините кои Грција ги најави за Северна Македонија, утре наутро се очекува да пристигнат во Скопје. Се работи за 20.000 дози од Астра Зенека.
РОДОВИ ПЕРСПЕКТИВИ Општина Карпош се вклучи во проектот „Промовирање на родово-одговорни политики и буџети: кон транспарентно, инклузивно и отчетно управување во Република Северна Македонија“, информираат од Општината.
ЦИВИЛ 7: Младите и европските вредности, декретот на Бајден и самитот на Г-7
СЛОБОДНА ЗОНА
„Општество без сеќавање нема ни иднина. А оние што бришат архиви нема да го скријат своето мрачно минато и сегашност, туку само покажуваат какви ќе бидат и во иднина. Архивите не се бришат само за да се запретаат трагите од неделата, туку да се создаде простор за уште поголеми недела“, пишува Џабир Дерала во едиторијалот „Општество без сеќавања нема иднина“.
„Данските и финските навивачи одржаа една европска лекција по фудбал. Вистинските љубители на фудбалот од цел континент, фудбалските фанови ширум светот се обединија и му посакуваат на Кристијан Ериксен побрзо закрепнување… Оваа лекција е особено важна за оние усвитени глави меѓу фудбалските навивачи кај нас, оние што во фудбалот гледаат само уште една алатка за сеење омраза и поделби во и онака крајно поделеното и исполитизирано македонско општество“, пишува Петрит Сарачини во „Фудбалски навивачи со лекција по човечност“
„Во вториот дел од оваа анализа прочитајте малку познати или непознати факти за настаните од 2001 година, идеите за поделба на земјата и размената на териториите кои во тоа време некои се обидуваа да ги стават на маса. За да се разбере пораката од претседателот Бајден и за да се сфати колку се опасни игрите околу негирањето и поткопувањето на договорите како Охридскиот, Преспанскиот, Дејтонскиот и други, потребно е да се свертиме кон времето кога тие се донесени. Во ова продолжение, се враќаме во 2001 година“, пишува Александар Николиќ Писарев во анализата „Кој (не) ја разбра пораката од Бајден? (2)“
„Трендовите кои европската крајна десница се обидува да ги наметне во современите општествено политички текови, претставуваат обид да се врати времето на балканските крвопролевања, за кои мислевме дека се неповратно заминати во историјата. Тие сериозно се закануваат да ги оживеат сеништата на минатото“, се вели во вториот дел од анализата „Сеништата на минатото (3)“ на Александар Николиќ Писарев.
Б. Јордановска
