Теологот Хусеин Адеми реагира на лошиот однос на граничната полиција кои непрофесионално се однесуваат со теолозите (оџите). Имено, тој реагира на упатеното писмо до премиерот Зоран Заев, кој го потпишал еден докторант во една хумана наука а истовремено и исламски теолог познат во скопската чаршија, а сигурно и подалеку.
Адеми додава дека во писмото адресирано до премиерот Заев (Life for All), тој пишува за своето мошне стресно и непријатно искуство кое го доживеал на еден од нашите гранични премини, но, се чини дека благодарение на службите за безбедност од оваа наша татковина, таквото искуство го доживеал и тука некаде, во комшиските земји. Добредојде во клубот!
„Македонската полиција која ‘тренира строгочу’ веќе долг период наназад вака непримерно се однесува кон сите исламски теолози (оџи) без никакво објаснување и тоа веќе станува рутина. Имено, како тоа функционира? Кога го даваш пасошот, веднаш таму на мониторот се појавува некаква мерка која се води против тебе и полицаецот ноншалантно само ќе ти каже: „Паркирај десно!“ Тогаш ти одиш десно и чекаш сат, два три, четири… Не се знае како се расположени инспекторите и така ти висиш ко’ идиот доживувајќи стресови и трауми изложен на понижувачки погледи од сите тие што поминуваат покрај тебе небаре си некаков криминалец или отпадник осуден на срам и црвеење на образите!
Твојата брада говори дека личиш на терорист, твојата физичка појава „вреска“ дека ти си дежурната закана по безбедноста и сигурноста на Македонија, а ти онака јаден, во неизвесност очекуваш што ли ќе ти кажат овој пат, доколку имаат доблест да ти се обратат и да ти објаснат како на човечко суштество, а ја немаат сигурно, мислам на доблеста нели!?“, пишува Адеми.
Тој додава дека во 2012 година кога гостувал во емисијата кај Александар Чомовски, јавно говорел за овој проблем и цела Македонија имаше можност тоа да го чуе и види, но, на голема жалост, немаше голем ефект од тој јавно искажан протест.
Моето лично непријатно искуство со полициските алфи, како новинар и активист на ЦИВИЛ, беше инспирација за колумната -Алфите бркаат криминалци и џихадисти? Или „соросоиди“?, каде напишав: „Се обидов да дознам која е причината поради која сум сомнителен, но наместо одговор, добив контра – прашања: дали сум бил кривично гонет досега, дали сум имал проблеми со законот, дали сум бил некогаш заведен во полиција за некаков прекршок…?
Одговорив дека немав/м проблем со законот, ниту со полицијата. А одговорот на еден од „Алфите“ беше: „Аха, значи чист како солза“. Другиот се надоврза: „Велиш, од ЦИВИЛ си, од невладината на Сорос?“… Муратов додава: „Свесен сум дека мојот физички изглед на одредени луѓе не им се допаѓа, но драги полицајци/ки, нели, живееме во демократија и секој има право на слободно движење, верување, сакање, па и стил на облекување, фризура и брада и мустаќи“…
Адеми потенцира дека една од најважните повелби на Обединетите Нации е и таа дека човекот е во потполност слободно битие на кое му е загарантирана слободата на движење освен ако постои основано сомневање за планирање или можно изведување терористички акции. Но, тоа се случува само ако поединецот извршил или се подготвува да изврши такво ужасно нечовечко дело, а истото е 100% докажано со непобитни докази и неспорна аргументација.
„Но, во случајот на теолозите (оџи) од исламска вероисповест, таквата повелба воопшто како и да не постои. Тие се третираат како можна закана, иако за такво нешто не постојат никакви докази. Напротив, 99% од тие верски лица повикуваат во толеранција, мир, соживот со немуслиманите, а голем дел од нив, успешно се залагаат против секаков вид на верски радикализам или екстремизам којшто може да ни донесе само зло, а никако добро.
Членови на владата, гледајте малку прочепнете си во совеста и поведете сметка за нас муслиманските теолози, но и воопшто за вашите сограѓани од исламска вероисповест, престанете да се однесувате кон нас како да сме разулавени бикови, а вие тореадори.
Срамота е пред Бога, а потоа и пред народот, кон нас да се однесувате како разулавена толпа внатре во коридата жедни за нашата крв и чест, а ние секојдневно се залагаме барем нашите деца, ако не оваа моја генерација, да проживеат во убав културен дух на соработка и позитивна комуникација со нивните комшии, другари, колеги и соработници немуслимани.
Наместо да повикувате, преку министерството за култура, на јавни дебати за добробит на нашето општество и како заеднички да ја градиме иднината на оваа земја, вие во владата, се однесувате како воопшто да не постоиме, а сме дел од големата заедница на националното и верско шаренило во оваа наша Македонија. Колку само глупаво и ноншалантно се однесувате кон вашите муслимански сограѓани кои се красат со високо ниво на интелектуална наобразба и кои со својата дејност допринесуваат за мирот и хармонијата во ова напатено балканско парче земја.
Господа тореадори! Коридата е симбол на ѕверство и атак, а ние не сме бикови! Срам да ви е!“, додава Адеми.
Дехран Муратов
