Започна втората седмица по одржувањето на предвремените парламентарни избори во Република Северна Македонија. По релативно мирниот изборен ден и скандалозниот пад на сајтот на Државната изборна комисија при броењето на гласачките ливчиња вечерта, политичката сцена е во привиден мир, со силни припреми во позадина за преговарање за составувањето на новата Влада.
Минатата вечер заседаваше Централниот комитет на ВМРО-ДПМНЕ, на кој се донесоа новини во партискиот статут. Една од новините е дека статутот на ВМРО-ДПМНЕ веќе не предвидува Почесен претседател, што значи дека сегашниот, Никола Груевски (поранешен претседател на партијата и премиер на земјата, а сега политички азилант во Унгарија), како и други поранешни, нема да бидат веќе почесни претседатели, во согласност со новиот статут на партијата.
На синоќешната седница на ЦК на ВМРО-ДПМНЕ се донесе едногласна одлука за овластување на лидерот на партијата, Христијан Мицкоски, да учествува во преговорите за формирање на новата Влада на Република Северна Македонија. Од партијата соопштуваат дека новите одлуки се во однос на демократизација на партијата, пренесување на поголеми надлежности на членството, органите и телата на партијата, следејќи ги современите искуства на големите европски десничарски партии.
Поранешниот директор на УБК и поранешен член во ВМРО-ДПМНЕ, Сашо Мијалков кој, инаку, е формално во домашен притвор, порача дека актуелниот претседател на партијата, Христијан Мицкоски, треба да даде оставка заради слабиот резултат од изборите.
Од СДСМ реагираа на одлуките на синоќешната седница на ЦК на ВМРО-ДПМНЕ укажувајќи дека граѓаните на изборите јасно и недвосмислено ги казнија политиките на Мицкоски , и дека со наводните промени на статутот само го покриваат поразот.
Лидерот на СДСМ, Зоран Заев изјави дека процесот на преговорите помеѓу партиите за формирање на новата Влада, ќе започне по Илинден, односно по 2 август, и дека според резултатите од изборите, мандатот за формирање на новата Влада ѝ припаѓа на коалицијата „Можеме“ (СДСМ – БЕСА). И покрај предизборните изјави и препукувања со одредени партии, Заев соопштува дека ќе разговара со сите политички партии што се подготвени да го прифатат европскиот и демократскиот концепт на државата.
Од коалицијата на Алијансата за Албанците – Алтернатива најавуваат протести заради изборните нерегуларности што се случија во текот на изборниот ден, односно, според наодите од партијата, заради кражба на гласови и полнење кутии во одредени гласачки места. Протестот ќе се одржи во понеделник, а протестната поворка ќе тргне во 18 часот од Чаир, а ќе продолжи пред канцелариите на ЕУ во Скопје и Државната Изборна Комисија. Коалицијата Алијанса за Албанците – Алтернатива поднесоа 74 приговори до ДИК. Сите приговори беа одбиени.
До Државната изборна комисија поднесени се 2.242 приговори од политичките партии што учествуваа во изборниот процес на 15 јули. ДИК ги одби сите приговори.
Тужби по решенијата на Државната изборна комисија за отфрлање на приговорите поднесени од политичките партии за предвремените парламентарни избори до Управниот суд досега поднеле само Интегра, Алијанса за Албанците – Алтернатива и Левица (дури 102 тужби). Рокот за поднесување тужби до Управниот суд е 24 часа откако политичките партии ќе ги добијат решенијата од ДИК.
Демократската Унија за Интеграции (ДУИ) во своите комуникации со медиумите и јавноста настапуваат како главен фактор за составување на новата Влада. Од ДУИ не поднесоа приговори до ДИК.
Диана Тахири
