“Ако некој е навреден се извинувам бидејќи не била таа намерата”. Со ваква порака, професорката Мухабије Фејзули, го оправда вчерашниот коментар кој содржи говор на омраза кон ромската заедница во земјава. Професорката преку Фејсбук статус објасни дека не и била намерата да ги навредува Ромите туку сите оние кои, според неа, лажно се солидаризираат со Ромите на Фејсбук, а поинаку ги третираат во реалноста.
“Не сум против Ромите, но иронично сакав да го изразам револтот кон оние кои на Фејсбук го сакаат целиот свет и секоја кауза ја претвораат во можност за пишување статуси со кои го задоволуваат своето его. И поддршката за Ромите треба да биде институционална. Секој ден ги навредуваат, ги газат со коли на раскрсници, ги земаат да чистат по куќи, а ги плаќаат помалку, ги прават крадци кога им текне, бегаат од нив како од зараза, а потоа во април се сеќаваат на нив со песни и лајкови по Фејсбук. Мојот протест беше овој, и иронијата беше оваа”, напишала Фејзули по објавата на текстот во Цивил Медиа.
Нашиот тим разговараше и со директорката на средното економско училиште “8 Септември”, Мирјета Иљази, која вели дека е зачудена и не верува на тоа што прочитала. Иљази вели дека професорката во нејзината работа и активности не покажала ниту еднаш елементи на омраза и навреда кон никого, но сепак тврди дека ќе разговара со неа и ќе го расчистат случајот до крај.
“Зачудена сум од таквата содржина и секако ќе разговарам со професорката да се запознам со повеќе детали. Инаку професорката до сега во ниту еден случај не изразила омраза или навреди кон ниту еден ученик, колега од ниту една етничка заедница. Напротив, таа е позната како слободоумна и е најактивна во активности кои се поврзуваат со соживотот. Работеше на активности на денот на Европа, Светскиот ден на екологија и многу други активности, сите со мешовит состав на ученици од многу заедници”, одговори директорката Мирјета Иљази.
А. Зеќири