Пред зградата во која се наоѓа редакцијата на дневниот весник Информер денеска беше организиран протест во организација на Женска солидарност поради објавување на интервју со серискиот силувач Игор Милошевиќ. Демонстрантите влегоа на преминот што води кон влезната врата на редакцијата, извикувајќи „Излезете надвор“, „Монструми“, „Затворете го Информер“. Тие гаѓаа со јајца кон зградата, а еден од демонстрантите го нападна главниот уредник на „Информер“ Драган Ј. Вучиќевиќ. На протестот беше присутна и полицијата.
Пред пристигнувањето до влезната врата од редакцијата се одржа протест пред зградата на Информер, а толпата извикуваше: „Срам да ви е“ и „Бандо медиумска“. Покрај активистите, на протестот присуствуваа и членовите на Движењето на слободни граѓани и Да не го давиме Белград. Тие носеа и транспаренти на кои меѓу другото пишуваше „Не кликаш на насилство, насилството се казнува“.
Анита Марковиќ од Женска солидарност изјави дека собраните девојки и жени се гневни и дека медиумите по којзнае кој пат ги изневериле жените.
Ако медиумите прават вакви работи, тие се директни соучесници и вршат насилство врз жените, истакна Марковиќ за Н1, додавајќи дека на насилникот не му е место во медиумите.
Таа побара објаснување како дошло до тоа некој да опишува чин на насилство во медиумите.
Насобраните на протестот ги исвиркаа полициските автомобили кои минуваа покрај нив. На собирот потсетија дека Информер претходно ги релативизирал жртвите на насилство врз жените, доведувајќи ја во прашање веродостојноста на изјавите на жените кои откриле дека биле силувани.
Од српското Министерство за култура и информации се уште не се изјасниле во врска со интервјуто објавено во Информер.
Сопственикот и главен уредник на списанието Информер, Драган Ј. Вучиќевиќ за весникот Данас изјави дека мотивот за интервјуирање на серискиот силувач бил – новинарството.
На повтореното прашање од новинарот на Данас дека не го разбираат мотивот на разговорот, сопственикот на Информер одговорил дека „во тој случај не го разбираат новинарството“.
Тогаш не ги разбирате ниту BBC, NBC, SKY или USA Today. Мотивот е новинарството, како и во сите светски медиуми, истакна Вучиќевиќ.
