Предводени од братот и роднините на Ел Чека, како и од претставници на граѓански организации на Албанците во Северна Македонија, група граѓани протестираа денеска во Скопје против ДУИ, нејзините функционери, како и против монтираните судски процеси. Со извиците „Али предавник“ и „Али криминалец“, демонстрантите маршираа од плоштадот Скендербег до Владата на РСМ.
Претставниците на граѓанските организации и јавни личности побараа Владата да не ги штити функционерите на ДУИ за кои се слуша како прават злоупотреби во аудио материјалите објавени од Ел Чека, туку истите случаи да се расчистат до крај.
„Ние сме собрани тука за да им кажеме стоп на антивредностите, корумпираните, заложените, дегенерираните, рекетарите, убијците како и убијците на иднината на албанската младина и не само на нив. Денеска сме собрани за да им кажеме на чедата кои се родени во маката со кланот од Зајас, да бегаат што побргу од таа несреќа на Албанците која се вика ДУИ. Сите заедно протестираме против убијците на иднината на нашата младина“, изјави претседателот на Здружението на политичките затвореници Албанци од Македонија, Шпетим Положани.
Поранешниот пратеник Хисни Шаќири кој, исто така, го поддржа протестот, рече дека бомбите на Ел Чека ја открија вистината за начинот на владеењето на политичарите Албанци кои со децении се на власт во оваа земја.
„Бомбите кои ги објави Ел Чека беа една порака за целиот албански народ да се запознае директно со тоа што прават Албанците што учествуваат во власта. Не само што ги злоупотребиле правото и слободите на овој народ, туку на најгаден начин допреле и до интегритетот и достоинството на многу семејства. Тие се занимаваат со многу ниски работи што немаат никаква морална вредност и не им даваат никакво право да да си поигруваат со семејствата“, изјави Шаќири.
Пред да започне маршот, на плоштадот Скендербег се случи инцидент. Според мајката на Ел Чека, функционер на ДУИ го нападнал братот на Ел Чека, Блерим Ахмети, а таа самата беше покриена со крв, иако не се знае со каков предмет е удрена во моментот кога интервенирала да го одбрани својот син.
Арбен Зеќири