Украина, која во последните месеци бележеше значајни успеси на фронтот и во дипломатијата, се соочува со сериозни внатрешни политички и воени превирања што го засенија впечатокот за нејзиниот напредок во војната.
По успешните украински напади врз руски цели и обезбедувањето нова финансиска и воена поддршка од западните сојузници, вниманието се префрли кон судирот во самиот државен и воен врв, пишува Њујорк Тајмс.
Во центарот на кризата беше конфликтот меѓу тогашниот министер за одбрана Михајло Федоров и врховниот командант на украинската армија Олександр Сирски. Според Њујорк Тајмс, Федоров се залагал за забрзана модернизација на армијата, поголема употреба на беспилотни системи и роботизирани технологии, додека Сирски инсистирал дека класичната артилерија и пешадијата остануваат клучни во борбите на источниот фронт.
Несогласувањата прераснаа во јавен судир, откако Федоров остро го критикуваше военото раководство, обвинувајќи го за стратешка кратковидост, блокирање на помлади команданти и отпор кон технолошките иновации. Тој исто така тврдел дека се обидувал да ја сузбие корупцијата во одбранбените набавки.
По неговото разрешување избувнаа протести во повеќе украински градови, кои првично беа насочени кон поддршка на Федоров, но подоцна прераснаа во барања за смена на Сирски. На протестите учествуваа и активни војници и ветерани, што дополнително го зголеми притисокот врз претседателот Володимир Зеленски.
Како што пишува Њујорк Тајмс, Зеленски одржал серија консултации со воените команданти, по што донел одлука да го разреши Сирски. За нов врховен командант е именуван Михајло Драпати, 43-годишен одликуван офицер, кој претходно јавно застана на страната на Федоров во спорот околу идниот развој на украинската армија.
Извор: Њујорк Тајмс
