Пред Владата и синоќа се одржа протест под мотото „УЛТИМАТУМ – Не благодарам“, преку кој се бара да се отфрли францускиот предлог за кревање на ветото од Бугарија и деблокада на интеграциите на државава во Европската унија.
Дел од учесниците на протестот кон владината зграда фрлаа јајца, шишиња, цвеќе,… а откако ја поминаа заштитната ограда се стационираа пред кордонот полицајци. Скандираат „Оставка“ и пееа патриотски песни.
Протестот почна мирно, химната ја отпеа пејачот Ламбе Алабакоски, кој неодамна беше беше уапсен за опожарувањето на вратата на бугарскиот културен центар Иван (Ванчо) Михајлов во Битола.
Демонстрантите, предводени од лидерот на Левица Димитар Апасиев, ја турнаа заштитната ограда пред Владата, по што протест се пресели во кругот на владината зграда. Апасиев не ја прескокна оградата.
Демонстрантите фрлаа јајца, петарди, ролни хартија, пластични шишиња, балони со вода кон Владата и бараа оставки од власта и извикуваа „Никогаш северна, само Македонија“, „Оставка“, „Бугари“…
Забележливи беа демонстранти со качулки и покриени лица, како и маици со принт на бугарски јазик. На протестот се вееа државни знамиња и со сонцето на Вергина.
Дел од демонстрантите се префрлија пред Собранието, каде што ги пречека полициски кордон.
Протестот што почна завчера е поддржан од политички партии (ВМРО -ДПМНЕ, Левица и други) и граѓански организации кои сметаат дека предлогот е исклучително лош за македонскиот народ и македонските национални интереси.
Од завчера, пред Владата се паркирани неколку возила и шатори, во кои демонстрантите преспиваат, а улицата веќе втор ден е блокирана.
СДСМ го осуди насилството и инцидентите што се случија синоќа пред Владата. И ДУИ излезе со осуда за инцидентите.
Протестите започнаа во саботата на повик на лидерот на ВМРО-ДПМНЕ, Христијан Мицкоски. На протестот се придружија и други парти и граѓански организации. Демонстрантите сметаат дека предлогот е исклучително лош за македонскиот народ и македонските национални интереси.
Широките консултации на Владата со политичките субјекти во змејава продолжуваат, а за францускиот предлог ќе се расправа на пленарна седница во Собранието, на која треба да се донесат заклучоци кои ќе бидат обврзувачки за Владата и за нив ќе се гласа со просто мнозинство.
Д. Т.
