„Изневерени очекувања, надежи.. Никој во 1991-та, не очекуваше дека по 26 години самостојност, Македонија во сите сфери на животот ќе биде зад деведесеттите години, кога независната државата се градеше и се донесе Декларацијата за сувереност“, вели во разговорот за ЦИВИЛ Медиа, Тито Петковски, еден од претседателите на Собранието на Република Македонија, по повод 26-годишнината од донесувањето на Декларацијата за сувереност на Социјалистичка Република Македонија, на 25 јануари 1991 година
На собраниска седница која се одржа на денешен ден пред 26 години, Декларацијата беше изгласана едногласно, со 120 гласа „за“ на пратениците од првиот состав на парламентот.
„Македонија имаше одличен старт и на внатрешен и надворешен план, и демократијата почна да ги освојува граѓаните, односно, граѓаните да ја освојуваат демократијата. Првите повеќепартиски избори внесоа многу енергија, многу жар и многу очекувања меѓу граѓаните, независно од нивната етничка припадност. Мислам дека Декларацијата внесе огромен оптимизам меѓу граѓаните, дека сме веќе конечно, ‘свои на своето’. Македонија имаше шанси да биде меѓународно етаблирана држава, да биде демократска, да гарантира рамноправност на граѓаните, тие да имаат подеднакви услови во сферата на политиката, економијата“, се сеќава Петковски.
„Од тоа, денеска нема ништо! Денеска практично, животниот стандард е многу понизок отколку во деведесеттите години. Македонија е неизвесна на меѓународен план, на внатрешен план – етничките конфликти во секој момент може да ескалираат. Тогаш имавме постабилни, посигурни односи, и многу повисок степен на доверба. И затоа, велам дека Македонија, денес, 26 години по донесувањето на оваа Декларација, може да се дефинира како држава на изневерени очекувања на нејзините граѓани!“, вели Петковски.
Декларацијата ја изразува „сувереноста на Социјалистичка Република Македонија, во согласност со уставните определби за независност и територијален интегритет на македонската држава, како и правото на македонскиот народ на самоопределување, вклучувајќи го и правото на отцепување“.
По донесувањето на Декларацијата за сувереност, следуваше и донесувањето на Декларацијата по повод плебисцитарно изразената волја на граѓаните за суверена и самостојна македонска држава Македонија на 17 септември 1991 и Декларацијата за меѓународно признавање на Република Македонија како суверена и независна држава на 19 декември 1991.
Д. Муратов / М. Теговска