Срѓан Петрушевски, уредник на Радио Браво, Куманово, во интервју за ЦИВИЛ Медиа, изјави дека слободата на медиумите многу зависи од финансиската состојба на истите.
ЦИВИЛ: Што подразбирате по слобода на изразувањето, медиумски слободи и активизам?
Петрушевски: Под слобода на медиуми би требало да се подразбира пред сѐ информирање без никаков притисок за да можат граѓаните да согледаат состојбата во општеството реално. Слободата на изразување подразбира отсуство на страв кај граѓаните јавно да го изразат своето мислење, а за тоа да не трпат никакви последици. Со оглед на финансиската состојба на државата обично последиците се по работното место.
ЦИВИЛ: На кој начин ги поддржувате или можете да ги поддржите слободата на изразувањето, медиумските слободи и активизмот?
Петрушевски: Со тоа што ние во радиото немаме никаква обврска кон политичките партии ниту во изборниот ниту во предизборниот период. Во кратките вести информираме само за нивните активности. Ако барем една допирна точка имаме со нив, тие потоа тоа ќе го користат за вршење притисок. Дури и по цена на финансиите сакаме да си останеме сами на своето.
ЦИВИЛ: Дали се соочувате со притисоци од политичките и бизнис центрите на моќта и како се справувате со нив?
Петрушевски: Додека сум јас во радиото, навистина не сме имале никаков притисок. Од политичките партии пренесуваме само информации без никакви коментари. Пред сѐ сме концентрирани на музиката, спортот и културата. Сметаме дека на граѓаните им е преку глава од политика. Барем на оние што сѐ уште размислуваат нормално. Ние сме тука како некој вид издувен вентил на нашите слушатели.
Со оглед дека сме на работ на финансиско опстојување, знаеме дека ако имаме врски со политички партии кои се на власт, финансиски многу добро ќе поминеме, но последиците по самото радио, по угледот на радиото ќе бидат големи.
ЦИВИЛ: Кои се вашите препораки, како да се одбранат слободата на изразувањето, медиумските слободи и активизмот?
Петрушевски: Мислам дека медиумите чувствуваат притисок поради лошата финансиска состојба. Кога би се решиле финансиите мислам дека тогаш медиумите би биле слободни. Кога финансиски би биле појаки, да можеме да земаме нормална плата, да имаме повеќе вработени, побогата и поквалитетна програма, верувајте дека притисок ќе немаме…
Биљана Јордановска
Комера: Атанас Петровски
Овој проект е финансиран од Европската Унија преку програмата за мали грантови „Заштита на слободата на медиумите и слободата на изразување во Западен Балкан“ спроведена од Здружението на хрватските новинари, како дел од регионалниот проект „Регионална платформа на Западен Балкан за слобода на медиумите и безбедност на новинарите”, спроведена преку партнерство на шест регионални новинарски здруженија – Здружение на независни новинари на Србија, Здружение на новинари од Босна и Херцеговина, Здружение на новинари на Хрватска, Здружение на новинари на Косово, Здружение на новинари на Македонија и Синдикатот на медиуми на Црна Гора.
Овој проект е финансиран од Европската Унија преку програмата за мали грантови „Заштита на слободата на медиумите и слободата на изразување во Западен Балкан“ спроведена од Здружението на хрватските новинари, како дел од регионалниот проект „Регионална платформа на Западен Балкан за слобода на медиумите и безбедност на новинарите”, спроведена преку партнерство на шест регионални новинарски здруженија – Здружение на независни новинари на Србија, Здружение на новинари од Босна и Херцеговина, Здружение на новинари на Хрватска, Здружение на новинари на Косово, Здружение на новинари на Македонија и Синдикатот на медиуми на Црна Гора.
