И оваа година не изостанаа истрелите од оружје на партиските митинзи. Трагедијата во Тетово во која загинаа 14 луѓе во модуларната болница дел од партиските говори. Ветување за соработка со НВО секторот и учество на нивен претставник, како соработник на Кабинетот на градоначалникот…
ПУКАЊЕ НА МИТИНГ НА ДУИ
Пукање со оружје при отворањето на изборниот штаб на ДУИ во Чаир вчера ( 28 септември 2021 год). На отворањето присуствуваа вицепремиер Артан Груби, актуелниот градоначалник и кандидат за втор мандат во Чаир, Висар Ганиу и пратеникот, потпретседател на ДУИ и ексградоначалник на општината, Изет Меџити.
РЕАКЦИЈА НА АЛИЈАНСА ЗА АЛБАНЦИТЕ
Од Алијанса за Албанците го осудуваат пукањето од како што ги нарекоа „милитантите на ДУИ“ и бараат Обвинителството да покрене истрага.
„Додека ДУИ ветува живот, на отварањето на штабот во Чаир промовира смрт! Оружјето симболизира смрт и токму отварањето на штабот со истрели од огнено оружје од страната на милитантите на ДУИ, зборува за начинот на кој што оваа партија стреми кон победа, со закани, притисоци, манипулации и влевање на страв!
Строго ја осудуваме употребата на оружјето и бараме од Обвинителството да започне истрага за кривично дело- употреба на недозволено оружје на јавни настани. Бараме одговорност и од организаторите на собирот, значи од партијата што го организираше настанот, одговорност за опасноста што и се закануваше на граѓаните од истреланите куршуми во воздух“, велат од Алијанса за Албанците.
СДСМ
Потпретседателот на СДСМ, Оливер Спасовски на средба со граѓаните на Романовце и Пчиња истакна дека Оливер Илиевски е најдобриот градоначалник кој ќе му служи на народот и одлучува заедно со него.
Спасовски потенцираше дел од проектите за кои е сигурен дека кандидатот Илиевски ќе ги реализира како што се изработка на проект и изградба на канализациона мрежа и реконструкција на училишниот двор, детско катче за Романовце, изградба на водоводна мрежа, дислокација на депонијата, асфалтирање на патот од мостот до Бислимска клисура, изработка на филтер станица за Пчиња.
Лидерот на СДСМ, Зоран Заев истакна дека заедно со Зоран Зимбаков кандидат за градоначалник и актуелен градоначалник на Босилово се обврзуваат дека во Босилово ќе воведат дигитален онлајн систем за директен контакт на градоначалникот и советниците со граѓаните, а на иницијативите кои ќе дојдат од граѓаните да бидат одговорени во рок од 10 дена.
Претседателот на СДСМ, Зоран Заев, од митингот во Струмица порача дека само тие кои сработиле добро и секој ден работат сѐ подобро, можат со право и со чист образ да го ветат „Најдоброто“.
„Ќе воведеме дигитален онлајн систем за директен контакт на градоначалникот и советниците со граѓаните и постојана, брза, ефикасна размена на информации за услуги од надлежност на локалната самоуправа, како и соработка со НВО секторот и учество на нивен претставник, како соработник на Кабинетот на градоначалникот“, заклучи Заев.
ВМРО-ДПМНЕ
Претседателот на ВМРО-ДПМНЕ, Христијан Мицкоски, од митингот во Неготино, се обрати со навреди и обвинувања против СДСМ, кои ги нарече и предавници.
„Власта најлошо убедливо се справија со КОВИД во Европа. 14 луѓе живи гореа, 14 луѓе во тешка мака го загубија својот живот во Тетово, а нив мува не ги лази. Еве неколку недели поминаа, а нема ниту еден од нив не успеа достоинствено да се одважи и да понесе одговорност“, рече Мицкоски.
Христијан Мицкоски од Кавадарци порача дека треба заеднички да се гради патриотизмот на 21 век, а тоа е модерен обединувачки патриотизам.
„Заедничкиот патриотизам е да се победи заедничката мака, да се создаде заедничка иднина, заедничкиот нов патриотизам на денешницата претставува заедничко обединување со цел поразување на криминалот и корупцијата кои ја заробиле Македонија и заеднички да создадеме подобра и побезбедна иднина со отворање и на нови работни места“, истакна тој.
Кандидатот на ВМРО-ДПМНЕ за градоначалник на општина Велес, Марко Колев, ветува дека „Питијада“ во Велес ќе биде вратена на помодерен стил.
„Питијадата“ ќе биде вратена во еден помодерен стил и на помодерен начин на она што значи забава и привлекување туристи“, заклучи Колев.
ЗЕЛЕН ХУМАН ГРАД
Зелен хуман град во сабота на кејот на Вардар спроти објектот Те-то ќе оствари средба со граѓаните.
„Оваа сабота ќе се дружиме повторно, на следната Агора средба. Уште една интересна и горлива тема, енергетска одржливост како концепт, а и енергетска ефикасност на веќе изградени објекти. Тема на која постои многу простор за подобрување во нашето Скопје, но и во државата“, велат од ЗХГ.
Д. Муратов
