Пукна тиквата кај владините коалициски партнери поради промената на државниот грб. Најголемиот коалициски партнер ВМРО-ДПМНЕ и ЗНАМ на Максим Димитриевски имаат различни позиции по ова прашање. Додека ВМРО-ДПМНЕ е за промена, па дури и има идеја како ќе изгледа новиот државен грб, ЗНАМ на Максим Димитриевски е против.
Потпретседателот на Собранието, Антонијо Милошоски, смета дека Македонија не треба да остане меѓу ретките држави кои сè уште користат советска симболика на својот државен грб, заедно со Белорусија, Таџикистан и со Ангола.
Според него, отворањето на дебатата за измена на грбот не е поврзано со економската криза или со претстојните локални избори.
– Оваа иницијатива нема врска со изборите. Доколку зборуваме за современи државни обележја, засновани на хералдички принципи, тогаш Македонија навистина треба да изгради грб што ќе ја одразува нејзината историја и определби. Нашата земја има богато историско наследство, кое може да ги поврзе АСНОМ, илинденскиот период и други значајни моменти, а сето тоа да биде претставено преку еден современ државен грб. Таков симбол би ја позиционирал Македонија како дел од европските држави – изјави Милошоски, коментирајќи ја дебатата за промената на државниот грб.
Тој нагласи дека ова прашање не треба да се гледа како средство за дефокусирање на јавноста, туку како можност за креирање обележје што подобро ќе ја претставува земјата на меѓународно ниво.
Претседателот на ЗНАМ Максим Димитриевски смета дека државниот грб во моментов ги задоволува сите потреби и од историски континуитет и од географски континуитет и „ја отсликува реалноста на македонскиот народ и македонската држава“.
Третиот партнер во владината коалиција, ЗНАМ, смета дека ако веќе разговараме за промени на грбот или на државните обележја „ќе се отвори една голема дискусија, една голема тема“.
– Сите тие симболи нам нѝ значат, вклучувајќи го и лавот и сонцето од Кутлеш, коешто за жал согласно Преспанскиот договор повеќе не е составен дел од таа иконографија, но, како и да е – исто така е и петокраката. Ќе отвориме дискусија, па ќе видиме. Не сакам да отфрлам ништо од самиот почеток, изјави Димитриевски.
ЗНАМ, посочи Димитриевски, сметаат дека не треба да се дозволи од државните обележја да имаме дополнително наметнување на политиката и партизација.
Против измените се изјасни и лидерот на СДСМ, Венко Филипче, кој тврди дека државниот Грб доволно ги прикажуваат сите придобивки од народноослободителната војна и дека нема поделба по етничка линија.
Премиерот Христијан Мицкоски изјави дека политичкиот курс за промена на Грбот доаѓа по разговорите со коалициските партнери ВЛЕН. Владејачките албански партии бараат да се смени химната заедно со грбот и да се отсрани придавката 20% за Албанскиот јазик од Уставот.
Но, прашањето за државниот Грбот не е ново, бидејќи во 2014 година се разговараше меѓу ВМРО-ДПМНЕ и ДУИ, за вклучување на лавот во него како симбол што би ги претставувал и Албанците. Сега од партијата на Мицкоски оценуваат дека ќе се отвори дебата за измените, со цел да се постигне консензус во недефиниран рок.
Дестан Јонузи
