Покренуваме заедничка иницијатива со земјите од регионот со поддршка на Светска банка да направиме една работна група што ќе се справува полесно со аерозагадувањето, изјави заменик министерот за животна средина и просторно планирање Јани Макрадули на денешната регионална конференција „Управување со квалитетот на воздухот (AQM) во регионот на Западен Балкан – Прашања, решенија и можности за финансирање“ на иницијатива на Светска банка.
– Бидејќи сите земји од регионот имаат заеднички и слични проблеми и од начинот на затоплување, и од индустријата, степенот на развој и од состојбата со изворите на енергија што се користи, сметаме дека е полесно доколку заеднички настапиме не само во делот на активностите, туку и во мобилизирање на финансиски средства за справување со истите, рече Макрадули.
Додаде дека паралелно работат на трите приоритети што биле нагласени од страна на Светска банка, односно во делот на анализа, мониторинг, собирање податоци и привремено решавање на овој проблем со организирање прочистувачи за најранливите категории на граѓани.
Директорот на Светска банка за Северна Македонија и Косово во рамките на регионот на Европа и Централна Азија Марко Мантованели истакна дека се проценува оти 4,2 милиони луѓе умираат од аерозагадувањето секоја година.
– Регионот Западен Балкан не е исклучок, заболувањата, смртноста од загадувањето на воздухот се на врвот на овие причински фактори. Оваа агенда е на врвот на приоритетите на СБ како и на владите во регионот. Така што, нашата заложба тука е да помогнеме на владите, на Владата на Македонија да преминат на конкретни чекори на терен. Ова е сложено прашање кое што бара координирани решенија како на национално, така и на локално ниво, како во јавниот, така и во приватниот сектор, така што ја поздравуваме оваа иницијатива и се надеваме дека ќе изнајдеме конкретни решенија – помош со финансирање за да се помогне на граѓаните на Западен Балкан, рече Мантованели.
Извор: МИА
