Поранешниот генерален секретар на Владата, Драги Рашковски минатата година набавил софтвер за сообраќајни прекршоци за 81 илјади евра, меѓутоа Министерството за внатрешни работи се уште не го користи. Иако софтверот веќе е купен, од МВР се оградија од мешање на надворешни лица и органи при набавка на опрема, па така, софтверот нема да може да биде дел од системот „Безбеден град“ преку кој полицијата ќе може да изрекува казни преку видео надзор.
Премиерот Зоран Заев во врска со набавката на софтверот вели дека има писмена комуникација помеѓу Генералниот секретаријат на Владата и Министерството за внатрешни работи.
„Има причинско-правни последици зошто е тоа така направено. Со документи ќе покажеме зошто е набавен софтверот кој може да се употребува во МВР. Се работи за објект кој снима 360 степени, набавен врз основа на претходни длабински анализи. Ова е направено со причина. Не ни текнало така нас седејќи во Владата, ај ќе правиме софтвер. Ако не го користат сега, може во иднина ќе го употребат“, изјави Заев.
Поранешниот генсек Драги Рашковски на Фејсбук објавил дека не патентирал никаков софтвер, бидејќи во С. Македонија, според него, не е можно да патентираш софтвер, туку само идеја – постапка.
„Категорично демантирам и отфрлам каква било поврзаност или корелација меѓу моите патентирани идеи со набавките кои Генералниот секретаријат на Владата ги има реализирано во времето кога јас бев Генерален секретар.
За да биде уште појасна огромната разлика меѓу идеја и софтвер (производ), ја информрам јавноста дека уште во 2013 година имам патентирано идеја и за гласање со отпечаток од прст. И ја користам оваа прилика од напред да отфрлам каква било поврзаност на мојата патентирана идеја со било каков евентуален софтвер кој државата евентуално би го набавила после евентуален политички договор за употреба на таков софтвер за изборни процеси. Имам патентирани идеи и за попис од 2013 година, за поврат на ДДВ од 2016 година.
Не е во ред да бидам напаѓан затоа што сум имал идеи и истите сум ги патентирал, а денес се достапни како јавни добра и за нашата земја и за светот“, вели Рашковски.
Антикорупциската комисија отвори предмет за набавка на софтверот од страна на поранешниот генерален секретар на Владата, Драги Рашковски.
„По изнесените информации во медиумите, денеска на нашиот колегиум отворивме предмет сметајќи дека има доволно елементи за истражување на причините за набавката на тој софтвер, од една страна и од друга страна причината зошто тој се уште не е во употреба. И, она што беше ризично од наш аспект, несоодветната комуникација меѓу институциите и отсуството на системски пристап за утврдување на потребите. Тоа беа основните елементи по кои ние постапивме и по сопствена иницијатива, а по допрен глас од медиумите отворивме предмет, објасни Ивановска, одговарајќи на новинарско прашања по заедничкиот увид во новите простории со вицепремиерот за борба против корупцијата, Љупчо Николовски.
Опозициската партија ВМРО-ДПМНЕ обвини дека Рашковски набавил софтвер за кој и самиот е иноватор.
„Фактите се јасни, Драги Рашковски, од позиција на генерален секретар на Владата на Зоран Заев, наместо МВР, набавил софтвер за систем за кој што и самиот е иноватор со патентирано решение од 2018-тата година. Избраното и платено решение од Рашковски не се користи, самиот укажува на непроверена компатибилност пред набавката. Драги Рашковски и самиот е иноватор на софтвер и на хардвер за исти цели за што и ја направил набавката како генерален секртетар на Владата на Зоран Заев, рече портпаролот на ВМРО-ДПМНЕ, Наум Стоилковски.
Вицепремиерот Љупчо Николовски, пак, најави дека Владата ќе ги соопшти сите детали, факти и аргументи за случајот.
„Премиерот даде одговор. Нема после премиерот да коментирам. Дадена е насока од премиерот да се истражи, сите информации и детали денеска од Владата и Генералниот секретаријат ќе бидат соопштени. Медиумите транспарентно ќе ги добијат сите информации, изјави Николовски.
Д.М.