„Човековите прва во светот се под закана поради политичари кои користат ‘отровна и нехумана’ реторика против етнички или религиозни малцинства, со цел да ја засилат нивната политичка моќ“, се вели во извештајот на Амнести Интернешенел.
Во најновиот извештај на глобалната организација „Амнести Интернешнл“ за состојбите со човековите права во светот, во делот посветен на Македонија, се вели дека откритијата за висока корупција од 2015 година се попречуваат со заткулисни политички пресметки кои ја опструираат работата на СЈО, дека е ограничена заштитата на сведоци, и дека Ромите се соочуват со дискриминација во пристапот до основните права и услуги. Извештајот е критичен и за начинот на кој Македонија се однесува кон бегалците и мигрантите.
Во извештајот на „Амнести Интернешнл“ американскиот претседател Доналд Трамп, турскиот претседател Реџеп Таип Ердоган, унгарскиот премиер Виктор Орбан и филипинскиот претседател Родриго Дуерте се посочени како политичари кои се нарекле себеси „анти-естаблишмент“ и кои користат „отровна агенда која гони, обвинува и дехуманизира цели групи на луѓе“.
Според извештајот на АИ, 2016 е година на „цинично користење на реториката ние против нив“, со што заканите, омразата и стравот добиле глобални размери до ниво кое „не е забележано од 30-те години на минатиот век, кога нацистичкиот лидер Адолф Хитлер дојде на власт во Германија“.
Директорот на АИ за Европа, Џон Далхаузен, вели дека политичарите со својата реторика на исклучивост сурово омаловажуваат цели општествени групи и ја шират идејата дека некои луѓе се помалку вредни од другите, а први на удар се мигрантите. Како примери се посочени уредбата на Трамп за забрана за влез во САД на државјани од седум претежно муслимански земји, како и договорот меѓу ЕУ и Турција за запирање на мигрантите кои одат кон Европа, односно враќање на илегалните мигранти во Турција.
Презентирајќи го извештајот, Далхаузен истакна дека странците и муслиманите станале главна цел на „европската демагогија, која овие луѓе ги претставува како закана за безбедноста и за националниот идентитет, како крадци на работни места и како злоупотребувачи на социјалните системи“.
