Посетата на Христијан Мицкоски на Будимпешта и средбите со унгарскиот премиер Виктор Орбан отворија лавина реакции на социјалните мрежи. На ПРАШАЊЕТО НА ДЕНОТ: Што ќе ни донесе Мицкоски од Будимпешта? што ЦИВИЛ го постави на Фејсбук , над 400 граѓани коментираа во најголемиот дел со изразено негативен тон и недоверба.
Најчеста перцепција меѓу граѓаните е дека посетата ќе резултира со ново задолжување:
„Само кредити и тие деца што не се родени ќе треба да го плаќаат тој кредит.“
„Уште една милијарда кредит.“
„Кредит и задолжување… ништо добро за Македонија.“
Дел од коментарите алудираат на можни финансиски договори со странски партнери, вклучително и Кина, како и на зголемување на јавниот долг.
Името на поранешниот премиер Никола Груевски, кој доби азил во Унгарија во 2018 година, е меѓу најспоменуваните во реакциите:
„Освен Грујо, ништо друго нема да му дадат.“
„Прво кредит, па Орбан.“
„Грујо ќе го донесе.“
Некои корисници одат чекор понатаму, шпекулирајќи за можни политички договориво зависност од исходот на изборите во Унгарија на 12 април:
„А после 12-ти април, можеби ќе треба на Орбан да му го возвратат гостопримството со давање азил.“
Иако ваквите тврдења немаат официјална потврда, тие ја отсликуваат длабоката поларизација и недоверба во јавноста.
Граѓаните во коментарите ја поврзуваат посетата и со економските состојби во земјата:
„Од први април поскап леб, јајца, масло, шеќер…“
„Само пониски плати, пензии, здравство нула, судство корумпирано.“
Во овој контекст, дел од реакциите ја користат посетата како повод за поширока критика на економските политики и животниот стандард. Дел од коментарите се однесуваат и на можни геополитички последици:
„Блокада во ЕУ од Орбан.“
„Продадени медиуми и дефицит на демократија.“
„Уште долгови кон Кина.“
Овие ставови ја рефлектираат перцепцијата дека приближувањето кон политиките на Унгарија може да влијае врз евроинтегративниот процес на Северна Македонија.
Посетата на Мицкоски на Будимпешта доаѓа во период на засилени политички и економски предизвици, како и во услови на блиски односи меѓу дел од десничарските партии во Европа. Виктор Орбан важи за контроверзен лидер во рамки на Европската унија, често критикуван за политики поврзани со владеење на правото и медиумските слободи.
Истовремено, Унгарија претходно одигра клучна улога во случајот со Никола Груевски, што дополнително ја засилува чувствителноста на јавноста околу секоја политичка релација меѓу Скопје и Будимпешта.
ЦИВИЛ им благодари на сите што коментираат на редовното прашање на денот, но повикува и на вклучување со предлози за теми, прашања и активности. Организацијата и редакцијата на медиумската платформа, како и секогаш, ќе вложи напори да им излезе во пресрет на сите предлози.
Подготви: Б. Јордановска
