ПРАШАЊЕТО НА ДЕНОТ: ЕУ бара реформи. Што мислите за капацитетот на владата на Мицкоски за спроведување реформи? што ЦИВИЛ го постави на Фејсбук, отвори лавина реакции од граѓаните, во кои доминираат незадоволство од институциите, недоверба во политичките елити и песимизам за можноста за вистински реформи.
Голем дел од коментарите се фокусираат на состојбата во правосудството и корупцијата.
„Имаме судска мафија што ги штити криминалците“, „35 години прегорен систем“ и „државата е претворена во дива лига“ се дел од пораките во кои граѓаните оценуваат дека без темелни системски промени реформите се невозможни.
Некои граѓани сметаат дека актуелната власт нема политичка волја за европски реформи, туку дека приоритет се „тендерите“, „партизацијата“ и „богатењето на политичките елити“. Дел од реакциите потсетуваат и на зголемувањето на функционерските плати, оценувајќи дека тоа е „најголемата реформа“ што Владата ја спровела досега.
Во дискусијата има и ставови дека проблемот е поширок од една влада или една партија.
„Не се работи за тоа кој е на власт, туку менталниот склоп на народот треба да се промени“, пишува еден граѓанин, додека друг оценува дека „во овие 35 години ниту една година не била подобра од претходната“.
Се појавија и мислења дека Европската Унија бара реформи, но дека домашните политички структури немаат капацитет или интерес да ги спроведат. „Во држава со ЕУ стандарди тие ќе бидат вишок“, наведува еден од коментаторите.
Сепак, меѓу бројните критики имаше и поддршка за Владата. Дел од граѓаните сметаат дека „Владата си работи супер“ и дека не покажува „предавничка намера или свиткана кичма“, оценувајќи дека е потребна поголема трпеливост и стабилност.
Реакциите покажуваат длабока поларизација во јавноста околу реформскиот процес, евроинтеграциите и довербата во институциите, но и широко распространето чувство дека државата се соочува со сериозни системски проблеми кои траат со децении.
Б. Ј.
