Лавина реакции на граѓанките и граѓаните предизвика ПРАШАЊЕто НА ДЕНОТ: „Што мислите за владеењето на Александар Вучиќ во Србија?“ што ЦИВИЛ го постави на социјалните мрежи, откривајќи длабоко поларизирана јавност и силни, често спротивставени перцепции за актуелната политичка состојба во Србија.
Дел од коментаторите користат исклучително остар речник, опишувајќи го Вучиќ како „типичен балкански автократ“, „диктатор“ и лидер кој „владее со сила, заплашување и контрола“. Во некои реакции се оди и подалеку, со споредби со авторитарни лидери од минатото и тврдења за системско кршење на човековите права.
„Диктатор… владее со сила… убива, тепа, малтретира… човекови права – нула.“
Во сличен тон, други граѓани укажуваат на наводна поврзаност со меѓународни политички актери, оценувајќи дека станува збор за лидер кој е „дел од пошироки геополитички игри“, а не само резултат на домашна политичка динамика.
Од друга страна, постои и видлива група на коментатори кои го релативизираат ваквиот пристап, потенцирајќи дека Вучиќ добива континуирана поддршка на избори и дека неговиот легитимитет произлегува од волјата на гласачите.
„Кога некого ќе го изберат демократски, што ги боли другите како владее и зошто е избран? Народот си го гласа.“
Некои реакции одат и во насока на критика на опозицијата во Србија, која според нив не нуди реална алтернатива:
„Повеќе криви треба да им се опозициските лидери, а не Вучиќ… Тој кон своите гласачи си е доследен.“
Во дел од коментарите се отвора и прашањето за состојбата со демократијата на локално ниво, со повикување на наводни нерегуларности и насилство за време на изборните процеси:
„Видовме како ги тепа гласачите во Бор за време на локалните избори.“
Паралелно, дискусијата често се прелева и кон домашниот политички контекст во Северна Македонија, при што во некои реакции се прави споредба со локалните политички лидери, посочувајќи на сличности во стилот на владеење и политичката реторика.
И покрај различните ставови, заедничко за најголем дел од реакциите е силниот емоционален набој и чувството на недоверба – било кон власта, опозицијата или целиот политички систем како во Србија, така и во Северна Македонија
ЦИВИЛ им благодари на сите што коментираат на редовното прашање на денот, но повикува и на вклучување со предлози за теми, прашања и активности. Организацијата и редакцијата на медиумската платформа, како и секогаш, ќе вложи напори да им излезе во пресрет на сите предлози.
Подготви: Б. Јордановска
