ЦИВИЛ Медиа на својата Фејсбук страница го постави прашањето – Tреба ли проблематичните деца да се бркаат од училиште или да се работи со нив?
ЦИВИЛ Медиа ја следи темата околу бојкотот на наставата во скопските основсни училишта „Лазо Ангеловски“ во Ново Лисиче и „11 Октомври“ во Центар, поради еден проблематичен ученик од трето одделение. По итната средба на МОН и Одборот на родителите формирана е интердисциплинарна комисија за случајот.
Граѓаните со поделени мислења, некои сметаат дека треба стручните служби повеќе да работат со детето, други сметаат дека треба во посебно училиште или паралелка да учат проблематичните деца, додека трети велат дека таквите насилни деца треба или да се избркаат или да се однесат во Поправен дом, доколку родителите не можат да ги воспитаат како што треба.
Ви пренесуваме дел од стотината коментари:
- Ако се во Македонија се бркаат, во нормални држави се помага.
- Ако се земе предвид дека е во прашање дете, навистина дете кое има само осум или девет години, проблемот е и многу подлабок и многу поширок од надворешната манифестација на неговото однесување. Со тоа дете, кое очигледно тероризирало други деца уште од прво одделение, требало сосема поинаку да се постапува – аларм за учителката, за стручните служби во училиштето, за социјалните служби надвор од училиштето. Синергија на институции кои само заедно би делувале. Детето е последица на системот кој не функционира по сите нивоа и не е единствената, за жал.
- Ако има регуларни институции, се ќе биде во ред. Ама лошо е што останаа со купени дипломи, и затоа ќе доаѓа уште полошо.
- Гнил е системот. Социјалните служби се оптеретени со куп некомпетентни луѓе кои главна цел им е истополови бракови, наставниците секој ден се борат за гол опстанок, нека живеат само владините миленици со 2.000 евра плата, судии, обвинители…
- Прашање на денот, кој знае колку деца се во слична ситуација па јавно не знаеме! Јас како родител секогаш сум од страна на децата, каде се училиштата и институциите, освен образовна имаат и ВОСПИТНА улога?! Каде се?
- Па, зашто постојат училиштата? Да бркаат или да едуцираат деца?
- Требa да се воспитаат родителите. Детенцето сигурно не се родило такво злочасто. Ама и педагогот и наставниците, зашто примаат плата. Не се работи само со добрите деца. Тоа е колектив и со сите деца се работи.
- Стручните служби за тоа постојат во училиштата. Педагогот, психолог и учителката во соработка со социјалните служби со посебна програма за индивидуален пристап и работа може да дадат подобри резултати и позитивно да влијаат на проблематичното дете.
- Во овој синџир мора активно да се вклучат и родителите.
- Ако во догледно време нема резултат тогаш мора да се направат и здравствени психофизички анализи.
- Не смее детето да се остави надвор од системот и да биде пуштено на стихијата.
- Секое дете заслужува потребно внимание.
- Многу е лесно, проблемот да се префрли на другите да го решаваат. Многу е лесно да се отстрани детето и да се реши проблемот. Секоја образовно воспитна установа има социјални работници, да се детектира проблемот и да се пристапи кон ученикот на начин кој ќе придонесе за зголемување на комуникација и враќање на тоа дете во рамките на секојдневните обврски и бенефити кои треба да ги уживаат сите деца. Колку и да е комплексен проблемот мора да постои можност тоа дете да се врати во училиштето. Во спротивно ќе треба да заврши на улица, а таму се знае која е неговата иднина.
- Да се работи со нив секој заслужува шанса можеби понатака ќе биде поуспешен од другите деца.
- Секако дека треба да се работи со сите, па и со проблематичните деца. Но тие проблематични деца доколку родителите не можат да ги стават “во колосек”, треба да се приберат во ВОСПИТНО ПОПРАВЕН ДОМ ЗА МАЛОЛЕТНИЦИ и тука да се работи со нив и сличните на нив.
Да се избркаат проблематичните деца од училиште за да немаме „нов Коста“ или да се носат во Поправен дом
- Избркани да се работи на нив па кога ќе се подобрат да се вратат подобрени. Инаку нов Коста ќе излезе и ќе ги потепа сите. Мора казна и одговорност да има.
- Треба да се избркаат и потоа одвоено да се работи со нив, никој не е должен да биде под стрес и во опасност.
- На времето си постоеше институција за малолетни деликвенти, која за жал ја затворија. Во тој дом и тоа како се работеше со тие деца, психолози, педагози, драмски работилници, ликовни… Од тие деца на кои дома не можеше да им се помогне, помагаше институцијата. За жал намерно ја пропаднаа, па со инклузивноста мора секакви да трпиме. Е доста е! Во секоја нормална држава, има закон за ваквите и слични на него! Ниту едно дете не заслужува да живее во тортура, заради невоспитано мало деликвентче, кое прави што сака! Ги подржувам во целост родителите! Државава нека засука ракави и нека сработи што поскоро на овој проблем. Нека отвори домови за малолетни деликвенти. Е тогаш кога родителите ќе бидеме свесни дека некој ќе ни го одземе чедото и ние поинаку ќе воспитуваме!
Проблематичните деца да учат во посебни училишта или паралелки
- Порано имаше соодветни училишта за такви проблематични деца, не смее да се дозволи да малтретира други деца ама и несмее да се остави без образование.
- Треба да си учат во специјални училишта со дефектелози.
Д. Муратов
