ЦИВИЛ најостро го осудува говорот на омразата силно присутен во дел од предизборните кампањи и во јавната комуникација во изборен контекст. Особено се поприсутниот говор на омраза на социјалните мрежи алармантно потсетува дека е време да се стави крај на неказнивоста на говорот на омраза и говор што поттикнува дел од омраза. ЦИВИЛ ги повикува институциите, пред сѐ, Државната изборна комисија и обвинителството, како и медиумите и целата македонска јавност најостро да ги осудат и да ги отфрлат сите облици и изрази на говорот на омразата во јавните настапи на поединци и групи, но и да се најде механизам тој да не станува вирален на социјалните мрежи.
Мониторингот на ЦИВИЛ утврди дека се употребува експлицитен говор на омраза на социјалните мрежи, дел од интернет порталите, како и за време на јавните настани што ги организираат политичките структури што ги поддржуваат и промовираат своите кандидати за предвремените парламентарни избори.
Пример на дело од омраза е вандализмот и јасните заканувачки пораки упатени кон ЦИВИЛ.
Седиштето на ЦИВИЛ повторно е мета на вандализам со заканувачки и навредливи пораки. Панелот во дворчето зад седиштето на организацијата што се користи за состаноци и изјави за јавноста е турнат, а врз него е ставена лопата. Натписот со логото на организацијата и натписот „Слободна зона“ веднаш под него се скинати, а пред вратата беа истурени отпадоци. На вратата, со остар предмет е изгравиран зборот „Nazi“ (нацист).
Ова не е првпат ЦИВИЛ да биде мета на вакви напади со оглед дека нејзините претставнички и претставници се постојано под напад од националисти и радикали, па и од високи функционери на одредени политички партии и политички структури.
Мониторингот на ЦИВИЛ во последните неколку дена детектираше над 50 случаи на говор на омраза, во најголем дел на социјалните мрежи и интернет портали.
Од нив ги одвојуваме следните случаи:
Говор на омраза: „Глас за Заев е глас за ш….. премиер“!
Лицето Никола Пејовски на Фејсбук шири говор на омраза. Тој објавува статус: „Глас за Заев и сдс е глас за Албанец (ш……р) премиер!!! Е па чорба Македонче“. Под неговиот статус има неколку коментари кои исто така продолжуваат со ширење на говорот на омраза по партиска, етничка и верска основа. На неговиот Фејсбук профил единствено може да се види дека е член и активист на ВМРО-ДПМНЕ.
Говор на омраза: Џабирци ШИПТАРИШТА мразат Македонци до коска
Твитер профилот @DenicaMMM (очигледно лажен профил) е преполн со твитови со експлицитен говор на омраза, високо изразен национализам и поттикнува нетрпение од сите форми. Мониторинг тимот на ЦИВИЛ, меѓу другите твитови со срамни содржини забележува дека овој лажен профил (бот) се бави и со етничкото потекло на составот на тимовите на организацијата. Самиот наслов на објавениот случај посочува за кој член на организацијата се работи.
Говор на омраза и закана за активистот Ненад Јовановиќ
На активистот Ненад Јовановиќ му се упатени јавни закани на Фејсбук страната „Налет да се сторите“ дека нема да смее да излезе на улица откако гостуваше на емисијата „Само вистина“ на Канал 5, во која зборуваше дека лидерот на СДСМ, Зоран Заев не погреши што постигнаа Договор со Грција со кој се смени името на државата.
Повеќе за овие случаи прочитајте на civilmedia.mk и drejt.mk.
Б. Јордановска
Монтажа: Ариан Мехмети
