ТВ Дожд, последниот независен руски канал се враќа во етер по повеќе од четири месеци откако беше принуден да затвори поради покривањето на војната во Украина, јавува Би-би-си.
Руските власти ја блокираа телевизијата Дожд на почетокот на март, само неколку дена откако Москва ја нападна Украина. Многу вработени потоа ја напуштија Русија и подоцна почнаа да работат на обновување на каналот во странство.
ТВ Дожд вчера во 20:00 часот по московско време (17:00 часот по средноевропско време) ја продолжи својата работа од студио во летонската престолнина Рига со информативната програма „Овде и сега“. Од редакцијата рекоа дека добиле лиценца од ЕУ за емитување и целата програма ќе продолжи наесен од Рига и Амстердам, Париз и грузискиот главен град Тибилиси.
Сепак, аналитичарите велат дека за поголемиот дел од жителите во Русија, единствениот начин за пристап до каналот ќе биде преку Јутјуб на виртуелни приватни мрежи (ВПН).
Во март, рускиот телекомуникациски регулатор го блокираше Дожд бидејќи руската инвазија на Украина на 24 февруари ја опиша како војна. Новиот руски закон го криминализира ширењето „лажни информации“ за руската војска, вклучително и тоа инвазијата на Украина да се нарекува што било друго освен „специјална воена операција“.
Регулаторот ја обвинува ТВ Дожд и за поттикнување екстремизам, злоупотреба на руските граѓани, предизвикување масовно нарушување на јавниот мир и безбедност и поттикнување протести. Новите закони ги принудија сите големи независни и либерално ориентирани медиуми, вклучително и Ехо на Москва и Новаја газета, или да се затворат или да се преселат во странство.
