На 1.678-от ден од целосната руска инвазија врз Украина, Русија продолжи со масовни напади со дронови и наведувани авионски бомби врз украинските региони. Во ноќта меѓу 27 и 28 септември, Украина беше нападната со 165 беспилотни летала, меѓу нив 79 реактивни „Шахеди“, како и дронови „Гербера“ и мамец-дронови „Пародија“. Украинската противвоздушна одбрана собори или неутрализира 112 цели, но погодоци се регистрирани на 14 локации, а остатоци од соборени дронови паднале на уште шест места.
Амбасадорката на Украина во Северна Македонија, Лариса Дир, во објава на платформата X предупреди дека руските напади продолжиле цела ноќ и утрово, со удари врз Харкив и Кијив.
„1678. Цела ноќ и утрово рф ги напаѓа 🇺🇦 региони. Во Харкив беше извршен жесток напад врз повеќекатна станбена зграда, при што делумно се уништени вториот и четвртиот кат. Во Кијив има оштетувања од нападите со дронови – станбени згради и комуникациска инфраструктура #StopRussia“, објави Дир.
1678. Цела ноќ и утрово рф ги напаѓа 🇺🇦 региони. Во Харкив беше извршен жесток напад врз повеќекатна станбена зграда, при што делумно се уништени вториот и четвртиот кат. Во Кијив има оштетувања од нападите со дронови – станбени згради и комуникациска инфраструктура #StopRussia pic.twitter.com/haF2yH2yhG
— Larysa Dir (@dir_larysa) September 28, 2026
Еден од најтешките удари беше врз Харкив. Руските агресори погодија повеќекатна станбена зграда во Салтивскиот реон, а според првичните извештаи беа повредени најмалку 22 лица, меѓу нив и деца. Градоначалникот Ихор Терехов соопшти дека наведувана руска авионска бомба погодила станбен блок рано утрото и уништила два ката од зградата.
Подоцнежните извештаи од Харкив наведоа дека бројот на повредени се зголемил на 35, меѓу нив девет деца на возраст од 3 до 15 години. Според Харкивското регионално обвинителство, рускиот удар бил изведен околу 4 часот наутро, а службите ја утврдуваат точната муниција; според прелиминарната верзија, можно е да била употребена УМПБ-5. Државната служба за вонредни состојби соопшти дека спасувачите извлекле 32 лица од зградата.
Во истиот напад во Харкив биле оштетени пет станбени згради, 15 автомобили, цивилно претпријатие, шест приватни куќи, четири помошни објекти и продавница. Нападнати биле Салтивскиот и Кијивскиот реон на градот, а спасувачките операции продолжиле и по првичните извештаи.
Кијив, исто така, повторно беше под руски дронски напад. Во ноќниот напад врз главниот град беа повредени четири лица, а оштетувања беа регистрирани во четири реони. Во Подилскиот реон бил оштетен нестанбен објект, избувнал пожар и бил уништен дел од покривот; при втор удар ударниот бран оштетил прозорци на блиска станбена зграда, каде спасувачите пронашле тројца повредени. Во Холосијивскиот реон руски дрон погодил двокатна станбена зграда, при што било повредено едно лице.
Пожари избувнале и во деловни објекти во Печерскиот и Шевченкивскиот реон. Воздушната опасност за Кијив траела повеќе од девет часа, од попладнето на 27 септември до по полноќ на 28 септември, а утрото повторно била прогласена тревога поради нова закана од дронови.
Во пошироката Кијивска област, руските дронови погодија и цивилни локации надвор од главниот град. Според украински извештаи, во еден напад врз пазар загинале две лица, а десет биле повредени. Во Бородјанскиот и Билоцерковскиот реон биле оштетени цивилни објекти, меѓу нив и складиште за жито и станбена зграда.
Покрај станбените згради, Русија продолжува да ја таргетира и комуникациската инфраструктура. Reuters објави дека на 27 септември бил погоден главниот објект на „Кијивстар“, најголемиот мобилен оператор во Украина, а руското Министерство за одбрана тврдеше дека погодило и дата-центар на Vodafone Ukraine. Според украинското Министерство за дигитална трансформација, руските удари врз дата-центри и интернет-провајдери во изминатата недела предизвикале прекини на услугите за околу 100.000 домаќинства во Кијив и околината.
*
[АЖУРИРАНО] Подоцна во текот на денот беше регистриран и руски напад врз зградата на Националната академија на науките на Украина. Според украинските власти, во тек е спасувачка операција: екипите го гаснат пожарот и трагаат по луѓе кои можеби останале блокирани во зградата.
Амбасадорката на Украина во Северна Македонија, Лариса Дир, во нова објава на платформата X предупреди дека руските напади продолжуваат и врз институции од посебно значење за украинското општество.
„Руски напад врз зградата на Националната академија на науките на Украина. Во тек е спасувачка операција: екипите го гаснат пожарот и трагаат по луѓе кои можеби се заблокирани во зградата. #RussiaIsATerroristState #StopRussianAggression“, објави Дир.
Руски напад врз зградата на Националната академија на науките на Украина. Во тек е спасувачка операција: екипите го гаснат пожарот и трагаат по луѓе кои можеби се заблокирани во зградата. #RussiaIsATerroristState#StopRussianAggression pic.twitter.com/iDPD4Zz3ER
— Larysa Dir (@dir_larysa) September 28, 2026
За нападот се огласи и претседателот Володимир Зеленски, кој соопшти дека сите служби се ангажирани во спасувачката операција, гаснењето на пожарот и потрагата по лица кои можеби се наоѓале во зградата.
Зеленски нагласи дека денеска во Кијив биле нападнати и фармацевтска компанија и бензински пумпи, во Днипро — деловен центар, а во други градови и региони — цивилни објекти, претпријатија и комуникациска инфраструктура.
„За жал, има загинати… Моето сочувство до роднините и блиските“, порача украинскиот претседател.
Тој најави дека Русија ќе добие одговор за овие напади и порача дека секој партнер на Украина мора да види што значи овој терор. Според Зеленски, поддршката за Украина е поддршка за животот на луѓето и за принципот дека теророт „никогаш и никаде не смее да биде нормализиран“.
Со нападот врз зградата на Националната академија на науките, листата на денешни руски цели дополнително се проширува: станбени згради, пазари, комуникациска инфраструктура, фармацевтски капацитети, бензински пумпи, деловни центри и научни институции. Тоа уште еднаш ја потврдува природата на руската кампања — напад врз цивилниот живот, знаењето, инфраструктурата и институциите што ја одржуваат украинската држава и општество.
*
Украинскиот министер за надворешни работи Андриј Сибига оцени дека Русија ги таргетира големите украински дата-центри за да го наруши протокот на информации. Тој предупреди дека брзите известувања за ракетни и дронски закани спасуваат животи, затоа што комуникациската инфраструктура им овозможува на луѓето навреме да добијат информации за опасноста.
Овие напади се дел од пошироката промена во руската тактика. Reuters јави дека Русија во последните недели масовно употребува реактивни дронови што летаат побрзо и повисоко од постарите модели, со што ја оптоваруваат украинската ПВО. Во првите три недели од септември, според украинскиот премиер Сергиј Корецки, Русија лансирала 2.100 реактивни нападни дронови и 136 ракети врз Украина, при што загинале 288 лица, меѓу нив четири деца.
Reuters наведува дека новите реактивни дронови го нарушуваат секојдневниот живот, работата на институциите и бизнисите многу посилно од претходните фази на војната. Москва во последните месеци систематски ги таргетира и економските столбови на Украина – црноморските пристаништа, железницата, логистиката, магацините и индустриските капацитети.
Во изминатите 24 часа руските напади беа регистрирани и во други делови на Украина. Во Суми, според украинските власти пренесени од меѓународни медиуми, бил оштетен детски центар, а во Одеската област бил погоден југот на регионот, со оштетувања на станбени објекти, продавница, хотел, медицински објект и складиште за жито.
Во моментот на објавување на овој извештај, активни се тревогите за воздушни напади во голем дел од земјата.
Сликата од 28 септември е уште една потврда дека руските напади не се ограничени на фронтот. Таргетирани се станбени згради, пазари, деловни објекти, дата-центри, мобилни оператори, пристаништа, магацини, енергетска и комуникациска инфраструктура, токму оние системи што го одржуваат цивилниот живот.
Подготви: Џ. Дерала
ЦИВИЛ МЕДИА
