Жители на Општина Дебарца во близина на Охрид, апелираат до локалната и централната власт да преземат мерки за да се изгради нова брана и да се ревитализира пресушеното Слатинско Езеро. Според месното население, локалната власт и градоначалникот Игор Трајкоски, ветуваат изградба на нова брана од 2013, кога пукнала земјената брана, што довело до излевање на акумулацијата.
„Градоначалникот Трајковски ветуваше во изборната кампања атрактивно решение, со изградба на современ хотелски комплекс крај обновеното езеро. Подоцна, ексминистерот Михаил Цветков рече дека средствата се обезбедени и дека изградбата на нова брана ќе започне напролет. Но, ништо од ветувањата, езерото го нема, само мали количества вода од Мраморечка река минуваат низ празното корито обрастено со вегетација’, реагираат разочараните жители.
Од Министерство за животна средина посочуваат на чекорите што треба да ги преземе Општина Дебарца за ревитализација на езерото.
„Прво, Општината добива средства за меѓурегионален развој од ЗЕЛС, второ, треба да достави информација до Владата, за да може Министерството за финансии да го планира овој проект и да оддвои средства, зашто средствата не се планирани во годинешниот буџет, и не може да се реализираат ад хок решенија. Значи, на располагање им се државни фондови и средства од буџетот коишто може да ги искористат, но само ако аплицираат“, изјави за ЦИВИЛ Медиа, Сашо Секулоски, портпарол на Министерството.
Секулоски истакнува дека не само за изградба на брана, туку и за сите проекти што се во надлежност на ова Министерство, општините треба да аплицираат со свои проекти. Оние што се соочуваат со недостиг на водоснабдување, поточно имаат потреба од изградба на водоводи и канализации, треба да аплицираат и во Министерството за транспорт и врски, каде им е на располагање Програмата за финансирање водоводи и канализации. А, треба да ги користат и можностите на Фондот за меѓурегионален развој во ЗЕЛС.
„Во Министерството за животна средина, во моментов, е објавен конкурс на којшто општините може да аплицираат со свои проекти, за следната година“, потсетува портпаролот Секулоски.
М. Талеска
