Додека Мјанмар разрушен од граѓанска војна се бори да се опорави од разорниот земјотрес, САД се соочуваат со критики дека ја напуштиле земјата кога беа најпотребни – и им го отстапуваат глобалното лидерство во одговорот при катастрофи на своите ривали, објави Си-ен-ен, пренесува ЦивилМедиа.
Земјотресот со јачина од 7,7 степени според Рихтеровата скала, кој се случи на 28 март и уби илјадници луѓе, е првата голема природна катастрофа откако администрацијата на Трамп откажа милијарди долари од програмите за спасување животи во рамките на нејзината настојба да ја разбие Американската агенција за меѓународен развој (УСАИД), главната американска агенција за хуманитарна помош.
УСАИД го администрираше најголемиот дел од странската помош на Америка – 61% од вкупниот буџет од 71 милијарда долари во 2023 година. Но, откако ја презеде функцијата во јануари, администрацијата на Трамп отпушти илјадници свои вработени и намали 83% од програмите на УСАИД – вклучувајќи го персоналот и програмите кои работат на помош на Мјанмар. Во средата најавија и дека ќе биде отпуштен целиот странски персонал.
Тие намалувања се почувствувани во слабиот одговор на САД на земјотресот во Мјанмар, според експертите, откривајќи ја празнината во меѓународните мерки за помош за големи катастрофи.
„Тоа навистина му покажува на просечниот граѓанин на Мјанмар дека САД ги напуштиле“, изјави Франциско Бенкосме, поранешен висок советник за политика на УСАИД, за Си-Ен-Ен.
„Не само што Соединетите Држави испратија само мала количина помош, туку испратија само тројца работници, кои потоа беа отпуштени додека беа на теренот во Мјанмар и пружаа помош“.
Тројцата вработени во УСАИД беа отпуштени минатата недела, во рок од неколку дена по пристигнувањето во Мјанмар – добија известувања дека нивните улоги ќе бидат елиминирани во наредните месеци – потврди за Си-Ен-Ен, поранешната висока функционерка на УСАИД, Марсија Вонг.
Д. Мишев
