„Како прво интернет-радио во Македонија, станавме преопознатливи и по тоа што први почнавме да ги пренесуваме во живо протестите, за да нема простор да се обликува сликата за тамошните случувања. Со тоа дојде и идејата да направиме една ‘рекапитулација’ на сите иницијативи што ги посведочивме во изминативе шест години“, во разговор за ЦИВИЛ Медиа вели Петар Антевски, програмски координатор на Радио МОФ.
Како дел од прославата по повод шесте години работа на Радио МОФ, денеска во кафе барот „Излет“, со почеток од 18 часот, ќе се одржи панел-дискусија за граѓанскиот активизам со наслов: „Секој ден во шест!“
„Сметавме дека оваа панел-дискусија е многу значајна и потребна во овој момент, кога граѓанското општество е под константен притисок од одредени политички субјекти, па ова е и платформа на која активистите ќе имаат можност да кажат дека немаат намера да дозволат граѓанското општество да замре, зошто е значајно и како да се одржи“, истакна Антевски.
Со панел-дискусијата ќе се даде осврт на протестите и иницијативите што изникнаа во изминатите години, преку искуствата на луѓето што беа најгласни на улиците.
Говорници ќе бидат: Артан Садику (Солидарност), Александар Донев (Протестирам), Кристина Озимец (Правда за Кежо), Исмет Шабановиќ (Средношколски и Студентски Пленум), Филип Јовановски (Го сакам ГТЦ), Слободан Михајловски (Ние сме Карпош 4).
Модератор на дискусијата ќе биде Даниел Евросимоски, новинар од Радио МОФ.
Радио МОФ, организира повеќе настани на кои главниот фокус е ставен врз граѓанската ангажираност, како и поттикнување дискусија на теми што се од интерес на медиумот. Сите настани во рамките на програмата на „Хекса Мега Роденденот“ се отворени за сите, со цел – доближување до „обичниот човек“.
По денешната дискусија, следуваат и разговорот со младите актери од Театарот за деца и младинци, која ќе се одржи во вторник, во бифето на МКЦ од 21 часот, како и забавата што ќе се случи в среда во Радио Бар, со почеток во 18 часот.
М. Теговска
