СДСМ поднесува кривични пријави против премиерот/пратеникот Емил Димитриев, министерот за надворешни работи/пратеникот Никола Попоски, министерот за здравство/пратеникот Никола Тодоров и министерката за култура/пратеничката Елизабета Канчевска – Милевска, поради кршење на законот со извршување на двете функции паралелно.
Во Изборниот законик е наведено дека функцијата пратеник е неспоива со функцијата министер и дека со денот на верификација на мандатот за пратеник, функцијата министер престанува по сила на закон. Во ваков случај, министерствата не остануваат без раководно лице, бидејќи неговата должност ја презема заменик министерот.
„Наведените членови на ВМРО-ДПМНЕ смислено и во континуитет, од денот на верификација на мандатите за пратеници во Собранието на Република Македонија, паралелно ја вршат и функцијата министер. Со таквото однесување, тие ја злоупотребуваат службенат положба и овластување. СДСМ како одговорна партија, која се грижи за доследно спроведување на законите во Република Македонија, поднесува соодветни кривични пријави против наведените лица и очекуваме брза и ефикасна реакција од надлежното обвинителство“, изјави портпаролот на СДСМ, Петре Шилегов, пренесувајќи го партискиот став.
На дебатата на ЦИВИЛ Центар за слобода „Македонија: Правно и политичко лимбо“, професорите Светомир Шкариќ и Осман Кадриу, како и други експерти во нивните јавни настапи, алармираа за овој пропуст и истакнаа дека со извршување на двојна функција се прекршува законот.
Д. Муратов