Владата на Република Северна Македонија донесе одлука за продолжување на рокот на кризната состојба поради можност од нарушување на снабдувањето со нафта и нафтени деривати. Со измената на постојната одлука, мерката ќе важи од 21 јули до 20 октомври 2026 година.
Од Владата соопштија дека продолжувањето на кризната состојба има превентивен карактер и треба да обезбеди континуитет во институционалното постапување доколку дојде до нарушувања во снабдувањето или до значителни ценовни шокови на меѓународните пазари на нафта и нафтени деривати.
Одлуката доаѓа во период на нов раст на цените на светските пазари на нафта, поттикнат од ескалацијата на тензиите меѓу САД и Иран и стравувањата дека конфликтот би можел дополнително да го наруши транспортот на енергенси низ Ормутскиот Теснец и Црвеното Море. Во петочното тргување, суровата нафта „брент“ се искачи на околу 84,30 долари за барел, додека американската ВТИ достигна околу 79,11 долари за барел. Од почетокот на неделата двата референтни вида нафта забележаа раст од речиси 12 проценти, што ги зголемува стравувањата од нови ценовни притисоци на глобалниот енергетски пазар.
Главен фактор за растот на цените останува неизвесноста околу снабдувањето од Блискиот Исток. Според светските медиуми, новите американски воздушни напади врз цели во јужен Иран и возвратните ракетни и беспилотни напади на Техеран врз американски позиции во регионот дополнително ги зголемија ризиците за непречено снабдување со енергенси.
За Северна Македонија, која во голема мера зависи од увоз на нафта и нафтени деривати, ваквите движења на светските пазари можат директно да се одразат врз цените на горивата, трошоците на стопанството и инфлаторните движења.
ЦИВИЛ Медиа Деск
