На денешната прес-конференција, СДСМ го оцени како скандалозно и крајно неодговорно однесувањето на градоначалникот од ВМРО-ДПМНЕ Кирил Пецаков.
„Наместо во изолација како што му било одредено, додека го очекувал резултатот од тестот за Ковид 19, градоначалникот на Охрид се појави помеѓу охриѓани за Водици и ги стави во опасност сите присутни. Без маска и без никакво почитување на протоколите, Пецаков се ракуваше со граѓани, сопартијци и амбасадори“, истакна портпаролката на СДСМ, Богданка Кузеска.
Според неа, ова не е само непочитување на одредбите и законите, туку ова скандалозно однесување на Пецаков, како што го нарече Кузеска, е непочитување на граѓаните, на охриѓани, но и непочитување на лекарите и медицинските лица.
„Неодговорноста е одлика на градоначалниците на ВМРО-ДПМНЕ. Пецаков бил заедно и со Христијан Мицкоски, неговиот партиски шеф. Зошто Мицкоски молчи за ова скандалозно однесување на Пецаков(ски)? Ќе го повика ли на одговорност или ќе го штити? Или Христијан Мицкоски нема образ за ова затоа што и тој среде пандемијата шеташе по кафеани?“, праша Кузеска на прес-конференцијата.
Според СДСМ, Пецаков не треба да бара изговори со манипулации, за некакво скијање во Банско, туку да одговара.
Со реакција се огласија од ВМРО-ДПМНЕ. „СДСМ дефокусира од фактот дека со нивната неспособност убија 8 илјади луѓе, порано беше Наќе крив, сега Пецак им е крив“, се вели во реакцијата.
Според партијата од чии редови доаѓа градоначалникот Пецаков, СДСМ сака народот да заборави на целата нивна неспособност, обвинувајќи го политичкиот конкурент повторно за починатите во пандемијата, наводни провизии за вакцините и за пожари во болниците.
„А што се однесува на случајот кој што сакаат да го фабрикуваат околу градоначалникот на Охрид, Кирил Пецаков. Пецаков на 19 јануари се тестира за потреби од патување, а се изолира веднаш по добивањето на резултатот, СДСМ ќе одговараат за клеветите што ги шират“, се вели во реакцијата на ВМРО-ДПМНЕ.
Во објавената реакција, се вели дека градоначалникот Пецаков на 19 јануари направил тестирање за КОВИД за потребите од патување во странство со цел добивање на сертификат, а не затоа што чувствувал симптоми. Веднаш по добивањето на резултатот, кој го добил доцна во денот, а на кој бил позитивен се изолирал. Два дена по првиот тест градоначалникот Пецаков прави втор тест, на кој истиот е негативен, тврдат од ВМРО-ДПМНЕ.
„И двата теста се спроведени во Центарот за јавно здравје во Охрид, од каде и се шират сите небулози. Во наредниот период градоначалникот Пецаков ќе покрене постапки за клевета. СДСМ фабрикува случај каде што нема. И за тоа ќе има одговорност за сите инволвирани во фабрикувањето на лагата“, се вели во реакцијата.
Ц.Д
