Северна Македонија стана втората балканска земја по Романија која успешно ја заврши програмата за обука на првата група украински војници. Информациите за обуката до сега се чуваа во тајност од безбедносни причини.
Министерката за одбрана Славјанка Петровска во интервју во Тема на денот во Дневникот на Македонската телевизија во вторникот информираше дека е реализирана обука на украински војници во Северна Македонија , со што, како што рече, се потврдува нашата заложба за континуирана поддршка кон правото на Украина да се одбрани од руската агресија.
„Се понудивме и веќе ја реализиравме првата обука, првиот тренинг на украински војници кои успешно ја завршија обуката во Република Северна Македонија во објекти, во локации кои се сопственост на Армијата на Република Северна Македонија за што беше донесена соодветна одлука на Владата на Република Северна Македонија, а која од безбедносни причини ја соопштуваме откако таа заврши“, рече министерката. Петровска додаде дека ваквиот вид на поддршка и преку тренинзи и преку обуки кои се димензионирани согласно побарувањата на украинската страна ќе продолжи и во текот на 2024 година и сè додека за тоа има потреба.
Северна Македонија се вбројува во првите пет држави од членките на Алијансата кои најмногу помош пружиле на украинската војска во отпорот и во борбата кои тие секојдневно ја имаат повеќе од една година, рече министерката, и порача дека нема да отстапиме од таквата заложба.
„Остануваме отворени доколку има потреба од донација на оружје или каков било вид на вооружување кое го поседуваме, а кое согласно прописите во нашата армија не е неопходно и може да биде дадено. Таква одлука нема двоумење дека ќе донесеме“, рече министерката.
Таа додаде дека Северна Македонија, која влезе во НАТО во 2020 година, ќе продолжи да обучува украински војници во текот на 2024 година и „се додека има потреба од тоа“.
Петровска не откри каква обука добиле војниците, ниту колку војници поминале, или ќе поминат низ овој процес.
Обуката ја прави Северна Македонија втората балканска земја, по Романија, која нуди бази на своја територија за обука на украински војници, пренесува Балкан инсајт.
Романија понуди користење на своите бази од почетокот на руската инвазија за да биде домаќин на инструктори од други земји за обука на украински борци. Во ноември оваа година, таа отвори центар за обука за украинските пилоти за да научат да летаат со борбени авиони Ф-16 обезбедени од Западот во иднина.
Во август, Грција понуди и обука на украински пилоти Ф-16, но не на своја територија. Словенија се приклучи на напорите за обука во 2022 година, но ги испрати своите инструктори на местата за обука во Германија.
Минатата година, Хрватска размислуваше за отворање на своите бази за обука на украинските копнени сили, но потегот беше блокиран од хрватскиот претседател. Зоран Милановиќ.
Од почетокот на војната во Украина, Северна Македонија испрати десет серии воена помош во Киев и се смета за еден од главните придонесувачи на опрема меѓу сојузниците на Украина, земајќи ја предвид нејзината големина и население од нешто помалку од 2 милиони.
Малата земја, која во моментов се надополнува со западна опрема, и испрати на Украина околу 30 тенкови Т 72 од советската ера, 12 јуришни хеликоптери Ми 24 од советската ера и четири копнени јуришни авиони Су 25. Сите овие се купени од Украина, уште во 2001 година.
Северна Македонија, исто така, се приклучи на декларацијата на лидерите на групата Г7+ за безбедносните обврски во однос на Украина.
М. Д.
