Соработката помеѓу компаниите секогаш придонесува за размена на идеи и искуства, а посебно кога станува збор за соработка на домашни и странски професионалци во своето поле на дејствување. Досегашната соработка помеѓу Северна Македонија и Германија, ни дава за право да се надеваме на поголем развој на нашата економија и општество, изјави министерот за образование и наука Јетон Шаќири на денешната хибридна средна за вмрежување помеѓу германски и македонски институции и компании, посочувајќи дека тоа одличен е пример за соработката помеѓу двете земји, информираат од МОН.
– Како министер за образование и наука, сакам да изразам огромна благодарност за подадената рака од Владата на Сојузна Република Германија, која помогна нашите средни стручни училишта да го преземат моделот на учење преку работа, односно дуалното образование, кое изминативе неколку години бележи огромен напредок и предизвика зголемен интерес, не само кај учениците, туку и кај компаниите кои увидоа дека преку инвестирање во образованието, полесно обезбедуваат квалитетен и обучен кадар, кој веднаш по завршување на средното училиште е подготвен да се вклучи во работните и организациски процеси, потенцираше Шаќири.
Обезбедувањето квалитетен кадар, рече министерот, носи придобивки за македонските и европските претпријатија, придонесува за развој на техниката и технологијата, со што се олеснува и функционирањето во одредени гранки.
Министерот изрази благодарност до Германското друштво за меѓународна соработка во Северна Македонија (ГИЗ), кое години наназад, спроведува програми за професионална квалификација на потенцијалните млади професионалци од земјава, чија цел е решавање на два големи проблеми, односно невработеноста кај младите и недостатокот на квалификуван кадар.
– Верувам дека денешната средба ќе биде од големо значење за нашите училишта и компании кои се подготвени да се стекнат со знаења и обуки од познати институции и компании од Германија и истите да ги применат во секојдневното работење, изјави Шаќири.
