Претставувањето на кандидатите за градоначалници и советници во рамки на кампањата за локалните избори 2025 продолжува и денеска, во фокусот се митинзите и средбите со граѓанлите и граѓаните со обраќањата на лидерите на најголемите партии, како и на кандидатките и кандидатите за градоначалници и носители на листите за Советите на општините.
ДУИ и ВЛЕН со осуда за инцидентот во Куманово
ДУИ и ВЛЕН се сложија околу една работа, и двете партии го осудија инцидентот во Куманово и побараа надлежните институции, МВР и Обвинителството да ги идентификуваат сторителите и да изведат пред лицето на правдата
Изет Зејнеловиќ од партијата Демократи: Само со работа, ред и визија можеме да го подигнеме Тетово
Кандидатот за градоначалник на Тетово од партијата Демократи, Изет Зејнелови преку соопштение до јавноста информира дека својата предизборна програма ќе ја води под мотото „Само со работа, ред и визија можеме да го подигнеме Тетово“. Тој информира за клучните проекти кои имаат за цел да го унапредат животот во градот, да создадат нови работни места и да го направат Тетово чист, уреден и економски силен град.
Азири: Билансот на Бујар Османи е нула за Чаир, сè за сопствената кариера и за пазарите на ДУИ
Портпаролот на изборниот штаб на коалицијата ВЛЕН за општина Чаир, Сабри Азири, на прес-конференција уште еднаш ја отслика кариерата на кандидатот на НАИ за општина Чаир, Бујар Османи, набројувајќи ги неговите лаги и изедначувајќи ја неговата деценија на политичко дејствување со нула.
Филипче до Мицкоски: Македонија не е твој експеримент, ниту твој вилает
Вечерва од Гевгелија имам една порака за Христијан Мицкоски – Македонија не е твој експеримент, ниту твој вилает. Ова е наша татковина, наш заеднички дом и ние ќе се избориме за него, ние од СДСМ, ние коишто секогаш ја градевме државата во кризи, во несигурност, во време кога требаше храброст, а не популизам, порача лидерот на СДСМ, Венко Филипче, од вечерашната граѓанска трибина во Гевгелија во рамки на кампањата за локалните избори „Се бориме за нашиот дом“, на која беа претставени кандидатите за советници и кандидатот за градоначалник, Миле Атанасов.
Пецаков најавува старт на реконструкцијата на Холандскиот парк во Охрид
Кирил Пецаков, кандидатот за градоначалник на ВМРО-ДПМНЕ и Коалицијата, и се уште актуелен градоначалник на Охрид најави дека финализираат подготовките за почеток на реконструкцијата на делот кај споменикот на А. Ден Долард, попознат како Холандски парк.
Според Пецаков, се очекува реконструкцијата да започне наредните денови.
Апасиев на средба со граѓани во Неготино
Партијата Левица и претседателот Димитар Апасиев попладнево имаа средба со граѓани во Неготино. при што беше претставен Никола Ламбев, носител на советничка листа.
Д-р Трајановски: Две нови градинки и проширување на капацитетите на постоечките во општина Аеродром
Кандидатот за градоначалник на Аеродром од СДСМ, Александар Трајановски посочи на еден од најголемите проблеми во општината – недостатокот на слободни места во детските градинки. Родителите со години се соочуваат со листи на чекање за упис во градинка и преголеми групи на деца во градинките и вети две нови современи детски градинки предвидовме за следните 4 години – една во Мичурин со капацитет од 300 деца и една во Ново Лисиче со капацитет од 150 до 250 деца.
Мицкоски: СДСМ имаат слоган со кој велат се бориме за домот, на кој дом мислат на Халкидики или во Дубаи
-Претседателот на ВМРО-ДПМНЕ Христијан Мицкоски попладнево се обрати на народниот митинг во Маврово-Ростуше, во рамки на изборната кампања за локалните избори 2025 година, со слоган „Вистинскиот избор! Твојот човек! Твоето место! За твојата иднина!“, истакнувајќи дека коалицијата СДСМ, ДУИ, Левица ги врзува желбата за власт и омразата кон ВМРО-ДПМНЕ.
-СДСМ тврдат дека се борат за нивниот дом, според нивниот слоган за изборната кампања, но не се знае за кој точно дом зборуваат дали оној на Халкидики ли оној во Дубаи, додека ДУИ зборува за теми од пред неколку децении, наместо за иднината, кажа Мицкоски.
Каранфилова –Пановска од Неготино: Програмата на Мантев со низа мерки за лицата со попреченост
Заменик претседателката на СДСМ, Фани Каранфиловска Пановска, заедно со кандидатот за градоначалник на општина Неготино Петар Мантев, денеска оствари средба со претставници на НВО „Порака – Неготино“, здружение на родители на деца со ментален хендикеп, како и со Центарот за лица со попреченост.
На средбите во Неготино беше истакната јасната определба на СДСМ за инклузивност и еднакви можности за сите граѓани која што е внесена и во програмата на кандидатот за градоначалник, Петар Мантев.
Коњановски: Битола добива современа противпожарна станица, проект за безбедна иднина
Територијалната противпожарна единица во Битола е најстара на Балканот и датира од 1836 година. Овој факт сам по себе дава доволно голема тежина, изградбата на новата зграда да се нарече капитален проект, кој ќе им овозможи современи услови за нашите пожарникари, вели актуелниот градоначалник на Битола и кандидат за нов мандат од ВМРО-ДПМНЕ
Бајрам Реџепи: Лажните ветувања се кошмар за жителите во населбата Вонвардарска
Кандидатот за градоначалник Бајрам Реџепи од Националната Алијанса за Интеграција информира дека вчера остварил средба со жителите на населбата Вонвардарска, со кои разговарале за недовршените општински проекти. Реџепи најавува крај на овој модел на менаџирање на 19 октомври.
Герасимовски: Платите на хигиеничарите речиси двојно ги зголемивме, набавуваме и нова механизација за чист Центар
Градоначалникот на Општина Центар, Горан Герасимовски, се сретна со вработените од ЈП „Паркинзи на Општина Центар“, задолжени за одржување на хигиената, со кои разговараше за условите во кои работат и идните планови за унапредување на нивната работа,
„На секаков можен начин се трудиме да покажеме почит кон овие луѓе кои ја вршат најтешката, но и најважната работа во општината и градот. Речиси двојно ги зголемивме платите на хигиеничарите изминативе години, повеќе од половината кои беа непријавени веќе се со регулиран работен однос, а наскоро и останатите ќе бидат пријавени,“ рече Герасимовски и додаде дека во програмата се планира набавка на нова механизација и опрема која ќе им ја олесни работата на хигиеничарите, ќе ја зголеми ефикасноста и ќе овозможи побрзо и поквалитетно чистење на улиците и јавните површини.
М. Д.
