Заменик-лидерот на Зелената партија, Мотин Али, ги бранеше своите критики кон рабинот и резервист на Израелските одбранбени сили (ИДФ) од Лидс, кого го нарече „животно“, откако рабинот Захарија Дојч го обвини Али дека играл клучна улога во бранот закани што го избркале од сопствениот дом.
Како што пренесува Би-би-си, рабинот Дојч го напуштил својот дом во Лидс по совет на полицијата во Западен Јоркшир по поплавата од закани поврзани со неговата работа со ИДФ.
Во разговор за „Тајмс“, рабинот Дојч го обвини Али, кој е член на Градскиот совет на Лидс, дека играл клучна улога во засилувањето на нападите преку неговите објави на социјалните медиуми.
„Тајмс“ објави дека рабинот Дојч работел како студентски капелан на Универзитетот во Лидс во времето на нападите од 7 октомври 2023 година. Како израелски државјанин, тој бил повикан како резервист на должност во Израелските одбранбени сили. Рабинот наводно служел како чувар на конвои со храна и муниција што влегувале во Газа за време на неговата служба.
Во едно видео на сега приватен профил на социјалните мрежи, Али рекол: „Универзитетот во Лидс треба да ги штити своите студенти од ваков вид животни.
„Треба да ги заштитувате луѓето. Треба да ги заштитувате студентите од ваков вид животни, бидејќи ако тој е спремен да убива луѓе таму, како знаете дека нема да ги убие вашите студенти тука?“
Али не ја оспорил содржината на видеото кога бил прашан од Би-Би-Си.
Тој рекол: „Мислам дека секој што учествува во геноцид е опасност и треба да биде испитан од полицијата.
„Не верувам дека Британците, луѓето што ги уживаат слободите на оваа земја, треба да можат да одат во странска држава и да учествуваат во геноцид.“
Али ја опиша смртта на двајца Евреи во нападот во синагога во Манчестер во четврток како „апсолутна трагедија“ и изрази солидарност со еврејската заедница.
Но, во објавата што ја сподели денот по нападите од 7 октомври, Али порача дека „домородните луѓе имаат право да возвратат“ и повика на крај на „белиот супремацистички европски колонијализам на доселениците“. Подоцна се извини за „кратковидоста“ на објавата.
„Политичарите имаат одговорност за тоа како комуницираат, но исто така и медиумите имаат одговорност за тоа како комуницираат“, додаде тој. „Не треба да го поврзуваме она што се случува во Израел со британските Евреи – мислам дека тоа е неодговорно.
„Треба да ја изразиме нашата солидарност со британските Евреи во оваа земја, треба да ја изразиме нашата солидарност со сите маргинализирани заедници во оваа земја,“ рече Али
Али и претходно се извинуваше за „секое предизвикано вознемирување“., откако по неговиот избор за советник за округот Гиптон и Херхилс во мај 2024 година, веднаш се појави во насловите за својот победнички говор, нарекувајќи го својот избор „победа за народот на Газа“ пред да извика „Алаху Акбар“.
Лидерот на Зелените, Зак Полански, е под притисок да преземе акција, но тој застана зад својот заменик. Тој претходно го осуди напад врз синагогата во Манчестер, и ја обвини министерката за внатрешни работи, Шабана Махмуд дека е „длабоко неодговорна“ поради нејзините коментари за пропалестинските протести, кои ги нарече „фундаментално небритански“.
Д. Мишев
