За време на „Часот на сеќавање“ во Бундестагот по повод 80-годишнината од крајот на војната германскиот претседател Франк-Валтер Штајнмаер остро го критикуваше рускиот претседател Владимир Путин за, како што ги нарече, неговите „историски лаги“.
Обраќајќи се пред полна сала пратеници, меѓу кои и новата влада на канцеларот Фридрих Мерц, како и преживеани од Холокаустот и други специјално поканети гости, Штајнмаер ја осуди тврдоглавоста на Кремљ дека неговата војна против Украина претставува „продолжение на борбата против фашизмот“.
„Воената агресија на Путин, неговата кампања против слободна, демократска земја, нема ништо заедничко со борбата против националсоцијалистичката тиранија во Втората светска војна,“ изјави тој.
Тој ја пофали улогата на Црвената армија во ослободувањето на Германија од националсоцијализмот, која, како што рече, вклучувала „Руси, Украинци, Белоруси“ (Грузинци, Полјаци и други), сите кои се бореле под нејзиното знаме, како и за ослободувањето на нацистичкиот концентрационен логор Аушвиц, во јануари 1945 година.
„Најмалку 13 милиони од тие војници, и двојно повеќе цивили, ги загубија животите,“ рече тој. „Црвената армија го ослободи Аушвиц. Нема да заборавиме ништо од тоа.“
Но, додаде тој, со своите „историски лаги“, Путин го „пере империјалното безумие, тешката неправда и најтешките злосторства.“
Тој изјави дека е болно да се признае оти „ослободителите на Аушвиц станале новите агресори.“
Амбасадорите на Русија и Белорусија не беа поканети на комеморативната церемонија во Бундестагот, исто како што беа исклучени од други свечености низ Германија по повод одбележувањето на крајот на Втората светска војна, пренесе Гардијан.
